Shymkenttik «Bal-Tekstil» kilem fabrıkasy Maqtaaralǵa 6 mln teńgeniń kilemderin jetkizdi
TÚRKІSTAN. QazAqparat – Sý tasqynynan zardap shekken Maqtaaral aýdanyna Shymkenttegi «Bal-Tekstil» kilem fabrıkasy da kómek kórsetti, dep habarlaıdy QazAqparat Túrkistan oblysy óńirlik kommýnıkatsııalar qyzmetine silteme jasap.
Búgin Atakent aýylyndaǵy oblystyq shtab qoımasyna jalpy somasy 6 mln teńgelik 404 kilem kelip jetkizildi. Atalǵan kilem kerýenin «Nur Otan» partııasy saıası keńesiniń múshesi, «Bal-Tekstil» kilem fabrıkasynyń dırektory, belgili kásipker-metsenat Talǵat Ysqaqov maqtaaraldyqtarǵa dep arnaıy kómek retinde jóneltipti.
«Maqtaaral aýdanyndaǵy sý tasqynynan 6 myńǵa jýyq turǵyn zardap shekti. Myńǵa jýyq otbasy baspanasynan aıryldy. 8 myń gektarǵa jýyq egistik jer men mal-múlikterin sý shaıyp ketti. Osyny eskere otyryp, bizdiń ujym da Myrzashól halqyna kómek qolyn sozýdy azamattyq boryshymyz dep sanadyq. Biz jibergen kilemder jańa úıge kirip, qonys toıyn toılaıtyn turǵyndarǵa tegin taratylatyn bolady», - deıdi «Bal-Tekstil» kilem fabrıkasynyń dırektory Talǵat Ysqaqov.
Qoımaǵa kelip túsken kilemderdiń kórki kóz tartady. Kólemderi de san qıly. Úıge tóseletin shaǵyn ári iri kilemder oblystyq shtabtyń arnaıy jıhaz, kórpe-tósek jınalatyn qoımasyna túsirildi.
Aıta keteıik, búginde oblystyq shtab qoımasynda 300 myń tonnadan astam gýmanıtarlyq kómek kelip jetken. Onyń 91 myń tonnasy evakýatsııa oryndaryna taratylyp berilgen.
