Shymkentten Senat depýtattyǵyna 8 adam úmitker

ShYMKENT. QazAqparat  - QR Parlamenti Senatynyń depýtattyǵyna Shymkent qalasynan 8 kandıdat tirkeldi. Bul týraly QR Ortalyq saılaý komıssııasynyń resmı saıtynda málim etildi, dep habarlaıdy QazAqparat tilshisi.

Berik Imashevtyń tóraǵalyǵymen ótken jıynda Shymkent qalasynan QR Parlamenti Senatynyń depýtattyǵyna kandıdattardy usyný jáne tirkeý qorytyndylary qaraldy. Shymkent qalalyq aýmaqtyq saılaý komıssııasynyń derekteri boıynsha, Senatqa  barlyǵy 9 kandıdat usynyldy. Onyń ekeýin Shymkent qalasynyń máslıhaty usynsa, jeteýi - ózin-ózi usynǵan. Alaıda saılaý komıssııasy tek 8 kandıdatty tirkegen. Endi úmitkerler saılaýaldy úgit-nasıhat jumystaryn júrgizedi. Ol 15 qyrkúıekten 4 qazanǵa deıin jalǵasady.

Otyrys barysynda OSK músheleri, sondaı-aq Senat depýtattaryn saılaýdy elektrondyq súıemeldeý úshin Ortsaılaýkomnyń ınternet-resýrsyn paıdalaný týraly máseleni qarady.

Eske salaıyq, Qazaqstan Respýblıkasy Prezıdentiniń Jarlyǵyna saı 2018 jylǵy 5 qazanda Shymkent qalasynan Qazaqstan Respýblıkasy Parlamenti Senatynyń depýtattaryn saılaý bolady.  Saılaý Senat depýtattarynyń eki mandaty boıynsha bir mezgilde ótkizilmek. Shymkent qalasynan saılanatyn senatorlardyń ókilettik merzimi 2014 jáne 2017 jyldary respýblıkanyń basqa óńirlerinen saılanǵan Senat depýtattarynyń ókilettik merzimine sáıkes keledi dep kútilýde.