Shymkentten Dýbaıǵa ushatyn reıs ashylady
«Qazaqstan Respýblıkasy Investıtsııalar jáne damý mınıstrliginiń Azamattyq avıatsııa komıteti halyqaralyq baǵyttaǵy jańa reısterdi ashý jáne qoldanystaǵy baǵyttardaǵy jıilikterdi arttyrý boıynsha jumystardy jalǵastyryp keledi.
Bul rette, 2018 jylǵy 29 jeltoqsannan bastap Birikken Arab Ámirlikteriniń «Fly Dubai» áýe kompanııasy Shymkent - Dýbaı jańa reısin ashýdy josparlap otyr», - delingen komıtettiń Feısbýktegi paraqshasynda.
Shymkent - Dýbaı - Shymkent baǵytyndaǵy reıster aptasyna eki ret seısenbi jáne senbi kúnderi Boeing 737 ushaǵy oryndaıdy. Sonymen qatar, jolaýshylarǵa yńǵaıly bolý úshin jáne týrıstik maýsym men mereke aldyndaǵy kezeńde suranysty qanaǵattandyrý úshin «Fly Dubai» áýe kompanııasy 2019 jyldyń kókteminen bastap Astana - Dýbaı - Astana baǵyty boıynsha aptasyna oryndalatyn reıster jıiligin 4-5 reıske deıin kóbeıtýdi josparlap otyr.
Komıtet atalmysh reıs Qazaqstan men Birikken Arab Ámirlikteri arasyndaǵy saýda-ekonomıkalyq baılanystardy nyǵaıtýǵa, sondaı-aq bıylǵy jyly respýblıkalyq mańyzy bar qala atanǵan Shymkenttiń áleýetin damytýǵa yqpal etedi dep málim etti.