Shymkenttegi jol uzyndyǵy 500 shaqyrymǵa artty
ShYMKENT. QazAqparat - Shymkent qalasynda ákimshilik iskerlik ortalyǵyndaǵy joldardyń uzyndyǵy 2 331 shaqyrymnan 2 810 shaqyrymǵa ósti.
Turǵyn úı-kommýnaldyq sharýashylyǵy, jolaýshylar kóligi jáne avtomobıl joldary salasy qala turǵyndary úshin eń mańyzdy salanyń biri bolyp tabylady. Sondyqtan da atalǵan salaǵa jergilikti bılik asa úlken mán beretini zańdy, dep habarlaıdy OQO ákiminiń baspasóz qyzmeti.
Máselen, qarjylandyrý baǵdarlamasy boıynsha turǵyn úı, kommýnaldy sharýashylyq bólimine bıyl 6,5 mlrd teńge jýyq qarjy bólindi. Bul degenimiz bólingen bıýdjet kólemi ótken jylǵymen salystyrǵanda 1,2 mlrd teńgege ósken. Al kólik ınfraqurylymyn damytýǵa qala qazynasy bul jyly 13,3 mlrd teńgeden astam qarjy qarastyryp, byltyrǵymen salystyrǵanda 6 mlrd teńgege artyq bólgen. Osyǵan baılanysty, shahardyń ákimshilik iskerlik ortalyǵyndaǵy joldardyń uzyndyǵy 2331 shaqyrymnan 2810 shaqyrymǵa ósti.
Munan bólek, 2016 jyly jergilikti bıýdjet esebinen shahardaǵy 21 kóshe men 6 saıabaq jáne 30 shaqty alleıa men aıaqjoldarǵa túngi shamdar qoıylyp, jaryqtandyrylǵan. Jalpy, osy jumystarǵa 30 myńǵa jýyq jaryq shyraqtary ornatylǵan. Aıta ketý kerek, osy jyldyń qazan aıyna deıin Shymkenttegi 24 kóshe men 689 aýlasy tolyqqandy jaryqtandyrylyp, 4 kósheni qaıta qurý jumystary júrgiziletin bolady. Bul qajettilikter úshin jergilikti qazynadan 455,7 mln teńge qarjy bólingen.
Ásirese, shahardaǵy jaıaý júrginshiler men velosıpedshilerge arnalǵan joldardyń qurylysy qarqyndy túrde júrgizilýde. Bıyl qalalyq bıýdjetten kólemi 40 myń sharshy shaqyrym bolatyn aıaqjoldar men velosıped joldaryn salýǵa 353 mln teńge qarjy qaralǵan.
Aıta keterligi, qazirgi tańda qala ákimi Ǵabıdolla Ábdirahymovtyń tapsyrmasyna sáıkes, kóp qabatty úılerdiń aýlasynda qoqys alańdaryn salyp, jańartý jumystary júrgizilýde. Aýlalardy abattandyrýǵa kóńil bólingen osy jyldyń sońyna deıin 70-ten astam aýlany retke keltirý kózdelýde. Nátıjesinde, joldar qaıta rettelip, aıaqjoldar qurylysy júrgizilmek. Qorshaýlar salynyp, dúńgirshekter men oıyn alańdary salynady. Bul úshin qala qazynasy 1,1 mlrd teńge qarastyryp otyr. Aıta ketý kerek, byltyr bul jumystar úshin qarjy qaralmaǵan edi. Al qaladaǵy kóp qabatty úı aýlalary sońǵy ret 2014 jyly jóndeý kórgen bolatyn.
