Shymkenttegi jappaı tártipsizdik kezinde beınebaqylaý kameralaryna túsip qalǵan vıdeolar jarııalandy

ShYMKENT. QazAqparat - Shymkenttegi jappaı tártipsizdik kezinde beınebaqylaý kameralaryna túsip qalǵan vıdeolar jarııalandy. Olardyń ishinde buzaqylardyń ortalyq alańdaǵy shyrshany jaǵyp jatqanyn, beınebaqylaý kameralaryn syndyryp, bankomat tonap jatqan áreketterin anyq kórýge bolady, dep habarlaıdy QazAqparat tilshisi.

Tártipsizdik jaıttary Shymkent qalasynyń Polıtsııa departamenti Jedel basqarý ortalyǵynyń qala aýmaǵyna qoıǵan beınebaqylaý kameralaryna túsken.

Buzaqylar qala ákimdiginiń janyndaǵy «Kórme» ortalyǵynyń ǵımaratyn búldirip, onda órt shyǵarǵan. Sondaı-aq, ákimdik aýmaǵynda turǵan polıtsııanyń qyzmettik avtokólikteri men turǵyndardyń kólikterin órtegen. Oǵan qosa, Ál-Farabı aýdany Polıtsııa basqarmasynyń aldynda turǵan qyzmettik avtokólikti jaǵyp jibergen.

Olardyń buzaqylyq áreketiniń nátıjesinde Beıbitshilik kóshesinde ornalasqan «Nur Otan» partııasy fılıalynyń ǵımaraty búlinip, otqa orandy.

Búlikshiler Nursat shaǵynaýdanynda ornalasqan «Metro» saýda úıiniń esik-terezesin taspen syndyryp, ishindegi bankomatty alyp shyǵyp, júk kólikke salyp urlap ketken.

Sonymen qatar, tártip buzýshylar qala aýmaǵynda kósheler qıylysy men kóshe jelilerinde qaýipsizdikti qadaǵalaý maqsatynda ornatylǵan birneshe «Sergek» jáne basqa da beınebaqylaý kameralardy syndyrdy. Bıik baǵanalarda ornatylǵan beınekameralardy olar arnaıy júk kóliginiń ústine minip, qoldaryndaǵy arnaıy jaraqtarymen uryp qıratqan.

Kameralarǵa túsken beınejazbalardan buzaqylar Rysqulov kóshesi boıynda júrip bara jatqan jedel járdem qyzmettik kóliginiń aldyna shyǵyp, toqtatyp, júrgizýshisin mazalap, kólik ishindegi medıtsınalyq zattardy tonap ketkeni de kórinedi. Sondaı-aq, tártip buzýshylar qala ákimdiginiń aldyndaǵy alańda ornatylǵan shyrshany tutatyp, ot qoıǵan. Alaıda, shyrshanyń belgili bir bóligi ǵana janǵan.

Qazirgi tańda qalanyń tynys-tirshiligin qalpyna keltirý maqsatynda is-sharalar júrgizilýde.