Shymkenttegi jańbyr jaýǵyzatyn apparat Almaty men Jetisý oblysyna áser ete almaıdy - klımatolog

TÚRKІSTAN. QazAqparat - Shymkentke ornatylǵan jańbyr jaýǵyzatyn apparattyń Almaty men Jetisý oblystaryndaǵy nóserge qatysy joq. Bul týraly halyqaralyq klımatologııa mamany Altaı Aınabek málimdedi, dep habarlaıdy QazAqparat tilshisi.

Shymkenttegi ındýstrıaldy aımaqqa qoıylǵan jańbyr jaýǵyzatyn apparat 31 shilde kúni iske qosylǵan bolatyn.

Sodan beri óńirde aspandy bult torlap, tipti keı aımaqtarǵa jańbyr jaýyp ta ótti.

«Bul - bizdiń jańa tehnologııanyń aýa temperatýrasyna áser etkendigi», - deıdi «International Center of Climate Change Technologies» ortalyǵynyń basshysy Altaı Aınabek.

Sala mamanynyń aıtýynsha, qurylǵy - atmosferanyń tómengi qabatyna teris zarıadtalǵan ıondar jiberý arqyly antıtsıklondy buzyp, tsıklondyq protsesterge áser etedi.

Saldarynan qajetti aımaqta atmosferadaǵy joǵary qysym tómendep, ylǵal tartyla bastaıdy. Nátıjesinde jaýyn jaýady.

«Qazirgi tańda qurǵaqshylyq, sý tapshylyǵy búkil álemde basty másele bolyp tur. Biz jańa tehnologııa arqyly qurǵaqshylyqty boldyrmaý, adamzattyń zalalynan tartylyp ketken Aral sııaqty teńizderdi qaıta qalypqa keltirýdiń ádisin qarastyryp jatyrmyz. Ázirge óz qarajatymyzdyń esebinen Shymkent qalasyna «Clear Sky Manager New Generation» tehnologııasyn ornattyq. Nátıjesinde ońtústik óńirinde tamyz aıynda qatty jaýyn jaýdy. Bunyń barlyǵy bizdiń tehnologııamyzdyń tıimdi ekenin taǵy dáleldedi», - dedi ol.

Degenmen, klımatologııa mamany Almaty men Jetisý oblystaryndaǵy nóser Shymkentke qoıylǵan jańbyr jaýǵyzatyn apparattyń áseri emes ekendigine senimdi.

Sebebi, jańa qondyrǵy kishkentaı bolǵandyqtan áser etý aýmaǵy da tar bolady. Sondyqtan tek shekaralyq oblystardyń ǵana klımaty ózgerýi múmkin.

«Jalpy bul tehnologııany Qytaı eli kóp qoldanady. Sondyqtan Almaty Qytaıǵa jaqyn bolǵandyqtan sondaǵy apparattar áser etýi múmkin. Sebebi jaqyn arada Qytaıda da qatty nóser boldy» - deıdi ol.