Shymkenttegi jańa Arbatqa granıtten Qazaqstannyń kartasy qoıyldy

  ShYMKENT. QazAqparat - Qazaqstan Respýblıkasynyń Tuńǵysh Prezıdenti kúnine oraı Shymkentte jańa Arbat ashyldy. Saltanatty rásimge Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov pen qala ákimi Ǵabıdolla Ábdirahymov, Túrkistan oblysynyń ákimi Janseıit Túımebaev pen qalalyq máslıhattyń depýtattary, qala turǵyndary qatysty, dep habarlaıdy QazAqparat tilshisi.

Jańadan ashylǵan demalys orny qala ortalyǵyndaǵy «Qııal álemi» saıabaǵy janynan oryn tepken. Beıbitshilik kóshesiniń Respýblıka dańǵylynan Ál-Farabı alańyna deıingi bóligi tutas demalys ornyna aınalyp, sý burqaqtary ornatyldy. Kópshilik seıil quratyn aımaqtaǵy jaıaý júrginshiler joly 12 sáýlettik músinmen erekshelenedi. 200-ge jýyq sándik aǵash egilip, bir bóligi kógaldandyryldy. Saltanatty rásimde qala ákimi Ǵabıdolla Ábdirahymov turǵyndardy merekemen quttyqtady.

 «Elbasynyń bıylǵy 19 maýsymdaǵy Jarlyǵymen Shymkent respýblıkalyq qala dárejesin alyp, jańa tarıhı kezeńi bastaldy. Mıllıon turǵyny bar megapolıs kún saıyn kórkeıip keledi. Mine, mereıli mereke - Qazaqstan Respýblıkasynyń Tuńǵysh Prezıdenti kúninde de qalamyzda jańa Arbat el ıgiligine berilip otyr. Bul kórikti aımaq Shymkent turǵyndary men qonaqtarynyń súıikti demalys ornyna aınalatynyna senimdimin», - dedi Ǵabıdolla Ábdirahymov.
 

Shymkenttikterdi merekemen Zaýytbek Qaýysbekuly men Janseıit Qanseıituly da quttyqtap, mıllıondy qalada atqarylyp jatqan tyndyrymdy isterdi atap ótti.

Aıta keteıik, Arbattyń ortasynda granıtten Qazaqstannyń atlas-kartasy jasaldy. Jalpy uzyndyǵy 430 metr aımaqta kólik qatynasyna shekteý qoıylyp, eki qaptaldan velosıpedpen serýendeý úshin arnaıy velojolaq salynǵan. Al Arbattyń eki jaǵyndaǵy úılerdiń qasbetteri kóriktendirildi.