Shymkenttegi zaýyttyń munaı óńdeý qýatyn arttyrǵan tıimdi – Energetıka mınıstr

ATYRAÝ. QazAqparat – Elimizde jańa munaı óńdeý zaýytyn salý qymbatqa túsedi. Al, Shymkenttegi zaýyttyń munaı óńdeý qýatyn arttyrý tıimdi bolmaq. Bul týraly Energetıka mınıstri Bolat Aqsholaqov málim etti, dep habarlaıdy QazAqparat.

Bolat Aqsholaqovtyń aıtýynsha, elimizde taǵy bir munaı óńdeý zaýytyn salý máselesi qarastyrylyp keledi.

«Alaıda, qazirgi eń qolaıly nusqa – Shymkent munaı óńdeý zaýytynyń qýatyn arttyrý. Qazir bul aımaq munaı ónimderin tutynýdyń negizgi naryǵy bolyp otyr. Al Shymkenttegi zaýyttyń munaı óńdeý qýatyn keńeıtý úshin barlyq jaǵdaı jasalǵan. Zaýyt jylyna 12 mln tonna munaı óńdeýge jobalanǵan. Jalpy zaýyttyq sharýashylyq pen zaýyt aýmaǵynyń ózi kásiporyndy birtindep keńeıtýge múmkindik beredi» -deıdi Bolat Aqsholaqov.

Onyń pikirinshe, jańa zaýyt salý qolda bar óndiristi keńeıtýge qaraǵanda, áldeqaıda qymbatqa túsedi.

«Zaýyttyń qazirgi qýaty – 6 mln tonna. Alaıda, másele zaýyt qýatyn birden 12 mln tonnaǵa deıin keńeıtý týraly emes. Dál qazir mundaı qajettilik joq. Jylyna 2-3 mln tonna munaı óńdeý – qalypty nusqa. Biraq, ázirshe mundaı sheshim qabyldanǵan joq. Óıtkeni bizde janar-jaǵarmaı otyny jetkilikti. Bul ónim úshin Qazaqstannyń eksport naryǵy sonshalyqty aýqymdy emes. Ortalyq Azııa elderi otyndy kóp tutynbaıdy. Al, Reseıde óndiris turǵysynan óz profıtsıti bar. Biz eldiń óz suranysyn jabý qajettiligine qaraı sheshim qabyldaıtyn bolamyz. Eger qazir másele rettelse, onda bizde Shymkent munaı óńdeý zaýytyn birtindep keńeıtýge jetkilikti ýaqyt bar», -dedi Bolat Aqsholaqov.

Eske sala ketelik, buǵan deıin Energetıka mınıstri Ázerbaıjan arqyly munaı tasymaldaý jospary joq ekenin aıtqan edi.

https://kaz.inform.kz/news/azerbayzhan-arkyly-munay-tasymaldau-zhospary-zhok-energetika-ministri_a3966287