Shymkenttegi syra zaýytynyń qazirgi qojaıyndary Tóleshovtiń burynǵy qaryzdaryn tóleıtin boldy
ShYMKENT. QazAqparat - Shymkentte sot syra zaýytynyń qazirgi qojaıyndaryna Toqtar Tóleshovtiń qaryzdaryn tóleýdi mindettedi. Eńbekshi aýdandyq soty shyǵarǵan sheshim boıynsha zaýyttyń burynǵy ıesi men «Shymkentsyra» JShS-y qaryz berýshi Marat Shavalıevke 71 mln 300 myń teńgesin qaıtaratyn boldy. Bul týraly sottyń baspasóz qyzmeti málim etti, dep habarlaıdy QazAqparat HAA tilshisi.
Buǵan deıin Marat Shavalıev Eńbekshi aýdandyq sotyna Shymkent syra zaýyty men Toqtar Tóleshovten burynǵy qaryzyn óndirý týraly talap aryz túsirgen bolatyn. Osy is boıynsha qaralǵan sot otyrysynda Tóleshovtiń 2007 jyly Marat Shavalıevten paıyzsyz 100 mln teńge qaryz alǵan. Kepilge zaýytty qoıyp, qomaqty aqshany 2008 jyldyń qyrkúıek aıynda qaıtarý týraly kelisimge qol qoıypty. Keıinnen sol aqshanyń tek 30 mln teńgesi ǵana qaıtarylǵan bolyp shyqty.
Keıinnen taraptar qaryzdy qaıtarý boıynsha qosymsha úsh ret kelisimshart jasasqan. Oǵan sáıkes Tóleshov aqshany 2011 jyldyń qańtar aıynda, keıinnen 2012 jyldyń jeltoqsan aıynda, sondaı-aq 2017 jyldyń jeltoqsan aıynda qaıtarýǵa kelisken. Kepilge taǵy da zaýyt qoıylypty.
Alaıda, kútpegen jerden Toqtar Tóleshov UQK qyzmetkerlerimen ustalyp, 21 jylǵa sottalǵan. Komıtettiń tergeý abaqtysynda otyrǵan kásipkerge Marat Shavalıev qaryzdy merziminen buryn qaıtarý jóninde eskertý jiberipti. Biraq eskertýi jaýapsyz qalǵan. Osydan keıin talapker Eńbekshi aýdandyq sotyna qaryzyn óndirý jóninde aryz túsirgen. Sot otyrysyna syra zaýytynyń ókili retinde Kamal Atajanov qatysyp, talapkerdiń ýájderin negizsiz degen bolatyn. Degenmen isti qaraǵan sot Marat Shavalıevke qaryzdardy Tóleshov pen «Shymkentpıvo» JShS-y qaıtarýy tıis dep sheshim shyǵardy.
Qalaı bolǵanda da qazir Toqtar Tóleshovtyń basy sottan arylmaı otyr. Ulttyq qaýipsizdik komıtetiniń ýaqytsha tergeý abaqtysynda qamaýda otyrǵan ol buǵan deıingi sot úkimi boıynsha 21 jylyn qatań tártiptegi túrmede jazasyn óteýi tıis. Sondaı-aq asa iri kólemde ekonomıkalyq qylmystar jasaǵany úshin qazir Eńbekshi aýdandyq sotynda taǵy sot otyrysy ótýde. Onyń úkimi qaı ýaqytta shyǵytyny da belgisiz. Budan bólek taǵy eki áıeli dúnıe-múlkin daýlap sotqa talap aryz túsirgen. Onsyz da dúnıe-múlki tolyqtaı tárkilenip alynǵan burynǵy kásipker endi Marat Shavalıevke qaryzyn qalaı qaıtaratyny da belgisiz.
