Shymkenttegi strategııalyq nysandardyń jumysshylaryn qala aýmaǵyna ornalastyrý tapsyryldy

ShYMKENT. QazAqparat – Shymkentte tótenshe jaǵdaı rejimin qamtamasyz etý jónindegi óńirlik shtabtyń kezekti otyrysy ótti. Basqosýda qala ákimi Murat Áıtenov qaýipsizdik sharalaryn kúsheıtý men strategııalyq nysandardyń daıyndyǵyn arttyrýdy, mekeme qyzmetkerleri men turǵyndardyń qaýipsizdigin qamtamasyz etýdi tapsyrdy, dep habarlaıdy QazAqparat tilshisi.

Jıynda sonymen qatar, tólemderge baılanysty barlyq qujattardy qabyldaý jáne túsindirý jumystary elektrondy túrde júrgizilýi tıis ekeni aıtyldy. Qala basshysy tıisti mekemelerge kópshilikke úgit-nasıhat jumystaryn kúsheıtýdi tapsyrdy.

«Karantınge deıin strategııalyq mańyzdy nysandarda jumys isteıtin mamandardy jumys berýshi óndiris aýmaǵynda eńbek etýine jaǵdaı jasaýy kerektigi sóz boldy. Ol úshin nysan aýmaǵynda arnaıy jataqhana jabdyqtap, qyzmetkerlerdi sol jerlerge ornalastyrýǵa bolady. Bul qurylys pen óndiristiń qajettiligine baılanysty eskerilýi kerek», - dedi qala basshysy.

Degenmen birinshi kezekte kúsheıtilgen kúzet pen qaýipsizdikti saqtaý eskeriledi. Sonymen qatar azyq-túlik dúkenderi men bazarlardaǵy saýda qatarlary sanıtarlyq norma boıynsha jumys isteýi qajet. Qala basshysy tıisti sala jetekshilerine blok beketterdi kóbeıtý týraly tapsyrma berdi. Qaladaǵy «Sergek» beınekamerasy ahýaldyq ortalyqqa qosylyp, jaǵdaı sol kameralardyń kómegimen baqylaýǵa alynady. Bekitilgen erejege sáıkes, qalaǵa eshkim kirip-shyqpaýy kerek. Óıtkeni Shymkenttiń aýmaǵy úlken, halyq sany mıllıonnan asady. Sondyqtan jurt shoǵyrlanǵan jerde qater joǵary.

Aıta keteıik, indetti juqtyrýy múmkin degen qaýpi bar azamattardyń barlyǵy tekserýden ótedi. Qalada zalalsyzdandyrý jumystary kúsheıtilip, qalyptasqan jaǵdaı turǵyndarǵa ýaqytyly habarlanady.