Shymkenttegi sharýalardyń salyq tóleý boıynsha problemalary bar- depýtat
«QR Parlamenti Májilisiniń depýtattary óńirlerge is-sapar barysynda halyqpen, aýyl sharýashylyǵy salasyndaǵy kisipkerlermen kezdesip, birqatar usynystary men talap tilekterin tyńdadyq. Kezdesý barysynda Shymkent qalasynyń aýyl sharýashylyǵy salasynda oryn alyp jatqan kemshilikter jeterlik ekenine kózimiz jetti. Solardyń ishindegi eń ózekti máseleniń biri – jer salyǵy. Shymkent qalasyna respýblıkalyq mańyzy bar qala statýsyn berer aldynda qalanyń bas jospary birneshe ret qaralyp, ózgergen bolatyn. Bas jospar jasalǵan kezde Túrkistan oblysynyń birneshe aýdandarynyń birshama aýyl sharýashylyǵy jerleri Shymkent qalasynyń aýmaǵyna ótken. Biraq bul ózgerister sharýa qojalyqtaryna salyq boıynsha úlken aýyrtpalyq týdyrdy. Qazirgi tańda sharýalar egistik jerdiń salyǵyn gektaryna emes, sharshy metirine tólep otyr. Nátıjesinde, egistik jerge mıllıardtaǵan salyq eseptelip otyr, munyń barlyǵy óz kezeginde óńirdegi aýyl sharýashylyǵy salasynyń aqsap jatqandyǵynyń birden bir sebebine aınalýda», - dedi B. Ospanov QR Premer-Mınıstriniń birinshi orynbasary Roman Sklıardyń atyna joldaǵan saýalynda.
Onyń aıtýynsha, Shymkent qalasynda aýyl sharýashylyq maqsatyndaǵy jerler kólemi 62 myń gektardy qurap otyr jáne 5 myń sharýa qojalyǵy tirkelgen. Ókinishke qaraı barlyq sharýa qojalyqtarynda osy sıpatta qıyndyqtar týyndaýda jáne aldaǵy ýaqytta bul jaǵdaı úlken daýǵa aınalý qaýpi bar.
«Sonymen qatar ózderińiz biletindeı, aǵymdaǵy jylǵy 16 naýryzda Memleket basshysy Qasym-Jomart Kemeluly Toqaev Qazaqstan halqyna Joldaýynda elimizdegi ákimshilik-aýmaqtyq qurylymnyń ońtaıly bolýy úshin qosymsha Abaı, Ulytaý, Jetisý oblystary qurylatyny jáne jańa oblystar ortalyqtary Semeı, Jezqazǵan, Qapshaǵaı, Taldyqorǵan qalalary bolatyny jóninde atap ótken bolatyn. Osyǵan oraı, qurmetti Roman Vasılevıch atalǵan máseleni sheshý boıynsha qala aýmaǵyna ótken eldi mekenderdegi aýyl sharýashylyǵy maqsatyndaǵy jerlerge arnalǵan jańadan bazalyq salyqtyq mólsherlemeler anyqtaý jáne salyqtyq mólsherlemelerdi bir sharshy metrine emes, gektaryna esepteý qajet dep sanaımyz», - dedi depýtat.
