Shymkenttegi saıabaqta toq soǵyp, aýyr jaraqat alǵan bala aýrýhanadan shyǵaryldy
ShYMKENT. QazAqparat - Shymkenttegi saıabaqta toq soǵyp, aýyr jaraqat alǵan bala aýrýhanadan shyǵaryldy. Úsh jasar Rınat Áýeltaıdy anasy Arys aýdanyna alyp ketti, dep habarlaıdy QazAqparat tilshisi.
Oblystyq balalar aýrýhanasynda bir jarym aıdan beri em qabyldaǵan búldirshinge kúıik bóliminde birneshe ota jasaldy. Anasy Janat Ázimovanyń sózinshe, dárigerler sanyndaǵy terini qolǵa japsyrý úshin taǵy bir otany josparlaǵan kórinedi. Alaıda kúıgen jerden tabıǵı túrde et ósken soń, ota jasalmaıtyn bolǵan.
«Dárigerler aldaǵy ýaqytta jazylyp ketedi degen senimde. Biraq oǵan eshkim kepildik bere almaıdy. Qoly qashan qımyldaıtyny da belgisiz. Mamandardyń aıtýynsha, bir jyl nemese úsh jyldan keıin bolýy múmkin. Nemese múldem qımyldamaı múgedek bolyp qalady degen boljamdar da aıtyldy. Qazir qoly gıpstelgen. Ony tek úsh aıdan keıin sheshpek. Sonan soń uzaq ýaqyt massaj, fızıoterapııa sııaqty em qabyldaýy kerek»,- deıdi balanyń anasy Janat Ázimova.
Eske salaıyq, osy jyldyń qyrkúıek aıynda úsh jasar Rınat anasymen birge Táýelsizdik saıabaǵynda qydyryp júrgen jerinde toq soqqan bolatyn. Abaısyzda qulap qalǵan bala ashyq turǵan symǵa qoly tıip, oń qoly qatty kúıip qalǵan edi. 4-shi dárejeli kúıik shalǵan balaǵa oblystyq balalar aýrýhanasynda birneshe ret ota jasaldy.
