Shymkenttegi «Samal» shatqalyna 5 myń túp aǵash otyrǵyzyldy
ASTANA. QazAqparat - OQO ákimi Janseıit Túımebaevtyń qatysýymen «Shatqal» baǵdarlamasy aıasynda qaladaǵy salynyp jatqan ekinshi saıabaqqa 5 myń túp aǵash kóshetteri otyrǵyzyldy, dep habarlaıdy oblystyq ákimdiktiń baspasóz qyzmeti.
«Samal» shatqaly dep ataý berilgen saıabaq 38 gektar aýmaqty quraıdy. Onyń uzyndyǵy 1750 metr bolyp keledi. Qaraýsyz qalǵan saı-salalardy abattandyryp, kógaldandyrý maqsatynda 15 myńnan astam - úıeńki, emen, shaǵan, shynar, qaraǵash, sekseýil, qaraǵan, jylaýyq tal men arsha, qaraǵaı kalıfornııalyq terek egiletin bolady.
Elimizdegi tuńǵysh joba bolyp sanalatyn baǵdarlamanyń jaı-japsaryna toqtalǵan óńir basshysy ıgi iske barshany bir kisideı qatysyp, qalany jasyl jelekke aınaldyrýǵa óz úlesterin qosýǵa shaqyrdy.
«Atalǵan baǵdarlama boıynsha aldaǵy ýaqytta Shymkent shaharynyń aımaǵyndaǵy shatqaldardy kógaldandyrýdy josparlap otyrmyz. Jalpy aýmaǵy 16 myń 800 gektardy halyq demalatyn oryndaryna aınaldyrýmyz kerek. Bıyl Shymkentte kólemi 100 gektarǵa jýyq 5 saı-salany demalys keshenine aınaldyramyz. Turǵyndarynyń sany mıllıonǵa jýyqtaǵan oblys ortalyǵynyń ekologııalyq ahýalyn jaqsartyp, jasyl qalaǵa aınaldyrýǵa tıispiz», - dedi Janseıit Qanseıituly.
Saıabaqqa kelýshiler ashyq aspan astyndaǵy amfıteatrlarda túrli uıymdastyrylǵan mádenı keshterdi tamashalaıdy. Odan bólek balalar alańshasy, shahmat pen doıby alańy, velojoldar men sporttyq jattyǵýǵa arnalǵan oryn men polıtsııa bólimshesi salynyp el ıgiligine beriledi.
Bul baǵdarlamanyń basty maqsaty - qaraýsyz qalǵan shatqaldardy halyq demalatyn saıabaqqa aınaldyrý. Bul ádispen salynǵan saıabaqtardy álemniń órkenıeti damyǵan elderi tabıǵı landshafty saqtalǵan dep joǵary baǵalap, súıikti demalys aımaqtarynyń birine aınaldyrǵan.
Aıta keteıik, shahardaǵy bos jatqan saı-salalardy kógaldandyryp, abattandyrý jumystaryna demeýshiler men erikti mekeme uıymdary da tartylyp jatqanyn eske salamyz. Máselen, M.Áýezov atyndaǵy OQMÝ ujymy jasyl jelek qataryn damytý jumystaryna óz úlesterin qosý maqsatynda 5 gektar jerdi kógaldandyrýǵa nıet bildirip otyr.
Ekolog ǵalymdardyń málimdeýinshe jeltoqsan-aqpan aılarynda egilgen jasyl jelekter tabıǵattyń túrli jaǵdaılaryna - ystyq pen sýyqqa tótep berip, tózimdi bolýǵa septigin tıgizedi.
Ótken aptada bıylǵa josparlanǵan 5 shatqaldyń alǵashqysyna senbilik uıymdastyrylyp, «Shymsaıa» ataýy berilgen saıabaqta bir kúnde myńnan astam kóshet egilgen bolatyn.
