Shymkenttegi prokýratýra keńsesinde er adam ózin-ózi órtemek boldy
Oqıǵa búgin tańerteń boldy. Qala prokýratýrasynyń front ofısine kelgen 15-ke jýyq adam, Eńbekshi aýdanynyń polıtsııa basqarmasymen tergelgen qylmystyq is boıynsha qabyldanǵan sheshimmen kelispeıtinin aıtqan. Sondaı-aq, qala prokýrorynyń jeke qabyldaýyn talap etken.
Shymkent qalasy prokýratýrasynyń kezekshi prokýrory túsindirý jumystaryn júrgizýi kezinde er adamnyń biri ústine benzın quıyp, óz-ózin órteýge oqtalǵan.
Prokýratýra qyzmetkerleri tez arada áreket etip, ony toqtatty.
Al, bir áıel adam ózin nashar sezingendikten, jedel járdem brıgadasy shaqyrtylyp, medıtsınalyq kómek kórsetildi.
«Atalǵan derek ál-Farabı APB-nyń AEK-na tirkelip, qazirgi tańda tekserý amaldary júrgizilip jatyr. Tekerý nátıjesine qaraı atalǵan azamattardyń áreketterine zańdy baǵa beriletin bolady», - delingen Shymkent qalasynyń prokýratýrasy taratqan aqparatta.