Shymkenttegi ortalyq stadıon eýro talaptaryna saı jaryqtandyrylmaq
ShYMKENT. QazAqparat - Shymkenttegi «Qajymuqan» ortalyq stadıony eýro talaptaryna saı jaryqtandyrlyp jatyr. Qazir munda zamanaýı elektr qondyrǵylarymen jabdyqtaý jumystary bastaldy, dep habarlaıdy QazAqparat HAA tilshisi.
Aıta keteıik, stadıon jaryqtyń bolmaýyna baılanysty fýtbol matchtaryn ótkizý quqyǵynan aıyrylǵan bolatyn. Elimizdegi úshinshi iri stadıonnyń jaryq qondyrǵylary 50-jyldan beri almastyrylmaǵan eken. Sonyń aldarynan «Ordabasy» komandasy Eýrolıga oıyndaryn Almaty qalasynda ótkizýge májbúr boldy. Kóp jyldan beri sheshimin tappaı kele jatqan jaryq máselesi jergilikti komandalardyń óz alańyndaǵy oıyndaryn ótkizýge asa kóp kedergi jasady. Qazaqstannyń fýtbol lıgasy ortalyq stadıonda oıyndar ótkizýge tyıym salǵan soń, «Ordabasy» óz kezdesýlerin amalsyz jaryǵy joq «Bıik» stadıonynda ótkizdi. Bul jankúıerlerge de qolaısyzdyqtar týǵyzdy. Stadıonnyń jaryqtandyrýy úshin ótken jyly arnaıy tender uıymdastyrylǵan bolatyn. Alaıda jeńimpaz kompanııamen tapsyrys berýshiler arasynda kelispeýshilik týyndap, eki aradaǵy daý sot arqyly biraz ýaqytqa sozyldy. Endi sottyń sheshimimen memlekettik bıýdjetten bólingen 204 mln 460 teńgege «Spektr energo» kompanııasy montaj jumystaryn bastap ketti.
«50 jyl boıy jóndeý kórmegen elektr júıesin ÝEFA talaptaryna saı jóndeý jumystary bastaldy. Ol úshin bir mezette bes túrli jaryq bere alatyn arnaıy projektorlar alyndy. Aıtalyq fýtbol matchtaryna arnalǵan jaryq sáýlesi jattyǵýǵa jáne búkilhalyqtyq sharalarǵa arnalǵan jaryqtandyrýlar bolady. Jeńimpaz atanǵan kompanııa projektorlarmen qatar elektr jelilerin de tolyq aýystyrady. Osynda tórt qondyrǵy munara bar. Sonyń birinshisi bitkennen keıin montaj jumystary qansha ýaqytqa sozylatyny tolyqtaı belgili bolady»,- dedi stadıon dırektory Quralbaı Ókshebaev.
Bıyl sondaı-aq shym shahardyń erekshe arhıtektýralyq nysandarynyń biri bolyp tabylatyn «Qajymuqan» atyndaǵy ortalyq stadıonyna 50 jyl tolady. Al jóndeý jumystary torqaly toıǵa degen erekshe tartý bolǵaly tur.
