Shymkenttegi onkologııalyq ortalyqqa jańa qondyrǵylar ornatylady
NUR-SULTAN. QazAqparat – Túrkııa kompanııasy Shymkentte emhana salmaq, dep habarlaıdy QazAqparat tilshisi.
«Jedel jerdem qyzmetiniń sapasyn jaqsartý úshin tozyǵy jetken avtokólik parkine memlekettik-jekeshelik áriptestik aıasynda 100 jańa arnaıy avtokólik berildi. Ol jerde biryńǵaı «Koll-ortalyq» iske qosylyp, qyzmet sapasy jáne brıgadanyń qysqa merzimde jetýine yqpal etedi. Qazirgi tańda densaýlyq saqtaý salasyna ınvestorlar tarapynan qyzyǵýshylyq joǵary. Memlekettik-jekeshelik áriptestik aıasynda taǵy 2 iri joba iske asyryldy. Atap aıtqanda, «Medıker» zamanaýı medıtsınalyq ortalyǵy ashyldy. Bul, qaladaǵy eki memlekettik emhanalardaǵy júktemeni 20-30 myń adamǵa jeńildetedi», - dedi Shymkent qalasynyń ákimi Erlan Aıtahanov OKQ-da ótken baspasóz máslıhatynda.
Ákimniń aıtýynsha, Qaıtpas-1 shaǵyn aýdanynda 500 oryndyq emhana qurylysy aıaqtalyp, kelesi jyldyń qańtar aıynda paıdalanýǵa beriledi.
«Kelesi jyldan bastap 20 densaýlyq saqtaý nysandarynyń qurylysy jeke ınvestorlarmen birlese júrgiziledi. Sondaı-aq, jeke ınvestor esebinen 1000 oryndyq kópsalaly aýrýhananyń qurylysy bastalady. Búgingi tańda, medıtsına salasynda 25 jyldyq tájirbıesi bar túrkııalyq «Orhýn Medıkal» kompanııasymen quny 4,1 mlrd teńgeni quraıtyn onkologııalyq ortalyqqa sońǵy úlgidegi zamanaýı pozıtrondy-emıssıondy tomografııa(PET), tsıklotron qondyrǵysyn ornatý jáne emhana salý boıynsha memorandým jasaldy. Bul jobalar bıýdjet qarjylaryn únemdeýge múmkindik berdi», - dedi ol.
