Shymkenttegi oblystyq aýrýhanalar Túrkistanǵa kóshirile me
TÚRKІSTAN. QazAqparat - Shymkenttegi oblystyq aýrýhanalar men ortalyqtar Túrkistanǵa kezeń-kezeńimen kóshiriledi. Degenmen, oblystyq densaýlyq saqtaý basqarmasynyń basshysy Muqan Egizbaev emdeý mekemeleriniń barlyǵy birdeı kóshirilmeıtinin aıtty, dep habarlaıdy QazAqparat tilshisi.
Basqarma basshysynyń aıtýynsha, Shymkentte ornalasqan oblystyq klınıkalyq jáne balalar aýrýhanasy sol jaqta qala beredi. Sol sııaqty oblystyq týberkýlezge qarsy jáne júıke aýrýlary dıspanseri, eki birdeı perınataldyq ortalyq naýqastardy shymshaharda qabyldaı beredi.
«Nege deseńizder, ondaı tájirıbe Almaty oblysynda da, Astanada da bar. Sebebi, shalǵaı ornalasqan Maqtaaral, Shardara sııaqty aýdan turǵyndaryna Túrkistanǵa qatynaý qıynǵa soǵady. Biz, sondaı-aq, Shymkenttegi burynǵy oblystyq densaýlyq saqtaý basqarmasyndaǵy eki kabınette arnaıy mamandardy qaldyryp otyrmyz. Sebebi, sol aýdan turǵyndarynyń keıbir máseleleri boıynsha aryz-shaǵymdar qabyldanady. Aýrýhanaǵa jatqyzý jaıttary qaralady»,- dedi Muqan Egizbaev.
Basqarma basshysy, sondaı-aq, keler jyldan bastap Túrkistan qalasynda birqatar emdeý mekemeleri salynatynyn jetkizdi.
«Jospar boıynsha, oblys ortalyǵynan 610 oryndyq oblystyq kópsalaly aýrýhana salynady. Ekinshi oblystyq balalar aýrýhanasyna qosymsha 150 oryndyq ǵımarat salynady. Odan bólek, 500 kelýshige arnalǵan emhana men oblystyq qan jáne SPID ortalyqtarynyń, týberkýlezge qarsy jáne onkologııalyq dıspanserdiń qurylysy bastalady. Bul maqsatta jobalaý-smetalyq qujattaryna qajetti qarjy bólindi. Endi qurylys basqarmasy tender jarııalap, bul qujattar jasalyp bitýi tıis. Jobalaý jumystaryna sheteldik kompanııalar da tartylady dep kútilýde. Sebebi, bul nysandar kórneki úlgide salynsa degen oıymyz bar»,- deıdi Muqan Keńesbekuly.
Taǵy birnshe nysandy salý úshin respýblıkadan qarajat bólý suralǵan. Máselen, Túrkistandaǵy perınataldyq ortalyqtyń janynan qosymsha 150 oryndyq ǵımarat salý qajettigi týyndap otyr. Sonymen qatar, Kentaý qalasy men Saıram, Jetisaı aýdandaryna, Myrzakent pen Atakent kentterine 5 emhana salýǵa da respýblıkadan qarjy bólý jaǵy qarastyrylýda.
