Shymkenttegi munaı qoımasyndaǵy órtti sóndirýge tikushaq jumyldyryldy
ShYMKENT. QazAqparat - Shymkenttegi munaı ónimderi qoımasyndaǵy órt áli aýyzdyqtalmaı otyr. Bes jarym saǵatqa sozylǵan jalyn bir sónip, bir janyp jatyr. Qazir alapat órtti tótenshe jaǵdaı qyzmetiniń tikushaǵy áýeden baqylaı bastady, dep habarlaıdy «QazAqparat» HAA tilshisi.
Tótenshe jaǵdaılar qyzmetiniń sońǵy málimetinshe, jalyndy aýyzdyqtaýǵa 35 tehnıkı men 100 tonna sý jetkizgen poezd qoldanylýda. Jergilikti bılik tarapynan 6 sý tasýshy kólikteri jetti. Órt sóndirýge 200-deı adam jumyldyrylǵan. Budan bólek jedel qutqarý jasaǵy men jedel járdem, polıtsııa, gaz mekemeleriniń qyzmetkerleri bar.
Oblystyq tótenshe jaǵdaılar departamentiniń bas mamany Zarıpa Turysbekovanyń sózine qaraǵanda, órt shyqqan kezde syıymdylyǵy 3 myń tekshe metrlik rezervýarda 1,5 myń tonna benzın bolypty. Qazir órt sóndirý jumystary áli de jalǵasyp jatyr. Onyń qaı ýaqytta aýyzdyqtalatyny da belgisiz kúıinde qalýda.
Aıta keteıik, búgin tańǵy 7.51 shamasynda «Shymkent munaı ónimderi» AQ-nyń qoımasynan órt shyǵyp, bir jumysshy qaza tapqan edi. Marqum bolǵan 46 jastaǵy azamat osy qoımada operator bolyp jumys istegen.
