Shymkenttegi metallýrgter stadıony qaıta jańǵyrtylady
ShYMKENT. Qazaqparat - Shymkenttegi metallýrgter stadıony qaıta jańǵyrtylady. Ótken ǵasyrdyń 50-shi jyldary salynǵan sporttyq nysan osy kezge deıin birde-bir ret jóndeý kórmegen. Sondyqtan, ony qala ákimdigi satyp aldy. Qazir stadıon jergilikti bıliktiń menshigine ótti, - dep habarlaıdy QazAqparattyń aımaqtaǵy tilshisi.
Stadıon adam shoshyrlyq kúıge túsken. Kez kelgen jan bas qaqpadan ishke engen boıda salaýatty ómir saltyn qalyptastyrýǵa emes, kerisinshe, jumysyn toqtatqan, bos qańyrap qalǵan zaýyttyń aýmaǵyna kirgendeı bolady.
Aýmaǵy 3 gektar jerdi alyp jatqan nysanda kóńil jadyratar eshteme joq. Oń qaptaldaǵy shaǵyn ǵımarat tozyp ketken. Kezinde munda aýyr atletterge arnalǵan sportzal bolatyn. Qazir, onyń syıqy bolsa, mynaý, - deıdi ıAroslav Antonov.
Aıtpaqshy, ıAroslav jeńil atletıkanyń chempıony eken. Paraolımpıada oıyndarynda Qazaqstannyń týyn jelbiretken sportshy. Ol osynda 16 jyldan beri jattyǵady. 
Júgirý alańy talapqa saı dep aıtýǵa aýyz barmaıdy. Kútip ustamaǵandyqtan, asfaltiń beti jarylyp ketken. Jaryq paıda bolǵan jerdiń astynan ajyraq shópterdiń basy qyltıyp ósip tur. Biraq, soǵan qaramastan, munda aýyq-aýyq sportshylar kelip, jattyǵatyn kórinedi.
Ár jerde shashylǵan turmystyq qaldyqtardy kórý qıyn emes. Bos qalǵan shyny ydystar men plastmassa qutylar laqtyryp tastaǵan jerde jatyr.
Kezinde stadıonnyń ákimshiligine arnap salynǵan qos nysan keńestik kezeńniń kózindeı áli tur. Esikteri jabyq turǵanymen, terezeleri synyp, keıbiri shytynap ketken.
Janǵa qolaıly eshteme tappaǵan sportshy qoldan jattyǵý quralyn ózi jasap alǵan.
Fýtbol alańyn shóp basyp ketken. Turaqty sýarylmaǵandyqtan bolar, oıyn alańshasynyń ár jeri topyraqqa aınalǵan. Dop qaqpasy joq deýge bolmaıdy, bar, biraq, oınaýǵa kelmeıdi. Endi bir shaǵyn fýtboldyń qaqpasy jerde tóńkerilip jatyr.
Stadıonǵa aınaldyra jaryq beretin elektr baǵanalarynan tek úsheýi ǵana qalypty. Onyń ózinde shamdary synyp, endi biri qısaıyp jerde jatyr.
Soǵan qaramastan, munda el Táýelsizdiginiń 25 jyldyǵyna oraı, fýtboldan jarys ótken.
Sportty janyna serik etken jetkinshekter myna bir usqynsyz saraıdyń ishinde jattyǵatyn kórinedi. Bar-joǵy 10 sharshy metrge arnalǵan bólmeniń jartysy matamen jabylǵan. Munda kelýshiler ózderi úshin múmkindiginshe qolaıly jaǵdaı jasaǵany kórinedi. Onyń ózinde shatyrynan sý aǵyp, qulap qalýdyń aldynda tur.
Jergilikti «Otyrar» telearnasy taratqan aqparatqa sáıkes, aldaǵy ýaqytta munda sportshylar úshin bar jaǵdaı jasalmaqshy. 2016 jyldyń sońynda qala basshylyǵy sporttyq nysandy 156 mln. teńgege satyp alǵan. Al ol buǵan deıin, aty áıgili qorǵasyn zaýytynyń balansynda bolypty. Aıtýlarynsha, munda eki sport zaly, jekpe-jekke arnalǵan oryn jáne joǵarǵy sport mektebiniń ákimshilik ǵımaraty salynatyn bolady.
Almas Sultan
