Shymkenttegi Qoshqarata ózeninen sharananyń máıiti tabyldy
ShYMKENT. QazAqparat - Shymkentte qalanyń tazalyǵymen aınalysatyn jumysshylar Qoshqarata ózeninen sharananyń máıitin taýyp aldy. Qoqystyń arasynan shyqqan qyz balanyń máıiti ekeni anyqtaldy, dep habarlaıdy QazAqparat tilshisi.
Oblystyq ishki ister departamenti baspasóz qyzmetiniń jetekshisi Saltanat Qarakózovanyń sózinshe, sarapshylar sharanyń shamamen 5 aılyq ekenin anyqtaǵan. Boıy 36 sm bolsa, salmaǵy 690 gramdy quraǵan. Máıitti qaraý barysynda eshqandaı zorlyq-zombylyq belgileri tabylmapty. Degenmen Ál-Farabı aýdandyq ishki ister qyzmetkerleri osy jáıtke qatysty qylmystyq is qozǵap, tergeý amaldaryn júrgizýde. Aldyn ala ony túsik tastaǵan áıel ádeıi sýǵa laqtyryp ketýi múmkin degen de boljam jasalýda.
