Shymkenttegi Qoshqar-ata ózeniniń jaǵalaýy kórkeıe túsedi
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Shymkent qalasynyń jańa kelbeti boıynsha jasalǵan jobalarmen tanysty. Aımaq basshysyna qala əkimi Nurlan Saýranbaev «Eski qalany jańǵyrtý» jobasy aıasynda Qoshqar ata ózeniniń jaǵalaýynda boı kóteretin «Qoshqar ata» turǵyn úı kesheniniń maketin kórsetti, dep habarlaıdy QazAqparat tilshisi.
Jańadan salynatyn turǵyn úı kesheniniń qurylysy úsh kezeń boıynsha júrgiziledi. Joba tolyǵymen júzege assa, 208 myń sharshy metrdi quraıtyn, 3976 páterli 61 kóp qabatty turǵyn úı el ıgiligine tapsyrylady. Oblys ákimi bul kúni sondaı-aq «Qarasý» jáne «Qoshqar-ata» ózenderiniń boıynda júrgiziletin abattandyrý jumystarynyń josparymen de tanysyp shyqty.
Joba boıynsha onda aldymen ózen jaǵalaýynyń eninen 10 metr, uzyndyǵy 1200 metr jer halyq qydyratyn demalys ornyna aınalady. Búginde atalǵan joba aıasynda Ordabasy alańynan Ózbek kóshesine deıingi ózen boıymen júrip ótetin 300 metr jaıaý júrginshiler joly kógaldandyrylyp, abattandyrý jumystary júrgizilgen.
Aldyn ala daıyndyq jumystary kezinde mamandar ózen boıyn zańsyz ıemdenip alǵan 96 jer ýchaskesin anyqtaǵan. Keıinnen halyqqa túsindirý jumystary júrgizilip, qajetti jerler memleket qajettiligine qaıtarylýda. Osynaý jobalarmen tanysyp shyqqan aımaq basshysy halyqty atqarylyp jatqan jumystarǵa túsinistikpen qaraýǵa shaqyrdy.
«Qoshqar ata Shymkenttiń tarıhı ortalyǵy sanalatyn kórikti mekenderdiń biri. Jaratylystyń mundaı ǵajap mekenin búkil halyqtyq ıgiligine aınaldyrýdy basty maqsat etip otyrmyz. Ózenniń jaǵalaýyn abattandyrýdy tek qana ekologııalyq tazalyq dep túsinbeý kerek. Munda týrızm ındýstrııasy degen úlken másele jatyr. Qonaqqa kelgen sheteldikterdiń tamashalaýyna sáýletti ǵımarattar azdyq etedi. Olar negizinen tarıhı-mádenı jerlerge kóbirek qyzyǵýshylyq tanytady. Osy rette Qoshqar ata ózeniniń úlken mánge ıe ekenin túsinýimiz kerek. ıAǵnı, osy arqyly týrısterdi kóptep tartýdy kózdep otyrmyz», - dedi Janseıit Qanseıituly.
Aıta keteıik, Qoshqar ata ózeni erekshe mádenı-tarıhı mańyzǵa ıe, kıeli meken dep tanylady. Sebebi, ózen jaǵalaýynda Qoshqar ata kesenesi ornalasqan. 2010 jyly jergilikti mańyzy bar erekshe qorǵalatyn aýmaq mártebesin aldy. Ózenniń bastaýynan Ordabasy alańyna deıingi aýmaqqa shamamen 1,5 shaqyrym jerde qalpyna keltirý jumystary júrgizilip, abattandyryldy. Al jalpy Qoshqar ata ózeniniń uzyndyǵy 78 shaqyrymdy quraıdy.
