Shymkenttegi Qoshqar ata ózeniniń bastaýynda jańa shaǵyn aýdan salynady
ShYMKENT. QazAqparat - Shymkenttegi Qoshqar ata ózeniniń bastaýynda jańa shaǵyn aýdan salynady. Sáýletshiler mundaǵy eski úılerdi buzyp, osy aýdandy kórkeıtýge qatysty "Jańartý" baǵdarlamasy qabyldaǵan. Qala basshylyǵynyń málimetinshe, qurylys 2018 jyly bastalmaq, dep habarlaıdy QazAqparat HAA tilshisi.
Jańartylýy tıis aýdannyń jalpy kólemi 29 gekterdy quraıdy. Joba boıynsha Qoshqar ata ózeniniń oń jaǵalaýyndaǵy 460 nysan súrilmek. Sonyń ishinde 420 jekemenshik úı bar. Bul nysandar súrilgen soń, ornyna 9 jáne 12 qabatty 61 úı, balabaqsha salynady dep kútilýde. Sondaı-aq osyndaǵy mektep te qaıta jóndeýden ótip, keńeıtilmek. Kommertsııalyq nysandar da salynady biraq olar turǵyndarǵa kedergi keltirmeıdi, - deıdi mamandar.
Al, eski úılerdi memleket muqtajyna alý máselesi birtindep sheshiledi. Bul tusta birneshe jol qarastyrylǵan. Mysaly, birinshi jospar boıynsha turǵyndardy ýaqytsha úılerge kóshirip, qurylys aıaqtalǵan soń burynǵy úıleriniń aýdanymen teń bolatyn páter beriledi. Al ekinshi jospar boıynsha turǵyndardyń úıleri baǵalanyp, satyp alynbaq. Usynylǵan eki joldy turǵyndardyń ózderi tańdaıdy.
Sáýletshiler sonymen qatar Qoshqar ata ózeniniń bastaýynan Ordabasy alańyna deıingi saǵasyn keńeıtý jobasyn talqylaýdan ótkizýde. Ondaǵy ósip turǵan aǵashtardy tolyq saqtap qalamyz dep otyr.
