Shymkenttegi qorǵasyn zaýytynyń 210 metrlik murjasy qulatyldy
Qalalyq Tótenshe jaǵdaılar qyzmetiniń málimetinshe, murjanyń túbin qoparý jumystary tórt táýlik boıy júrgizilgen. Ony tenderden jeńip alǵan kompanııa júzege asyrǵan. Temirbetonnan jasalǵan murjanyń dıametri 17,5 m, qabyrǵanyń qalyńdyǵy 80 sm quraıdy. Murjanyń qulaǵan kórinisi áleýmettik jelilerge tarap ketti.
«Murjany buzý jumystaryn júrgizý barysy Shymkent qalasy TJ departamentiniń bastyǵy azamattyq qorǵaý polkovnıgi Nurbolat Derbisovtiń jáne onyń orynbasary Madııar Jaqsybaevtyń basshylyǵymen ótti. Oqıǵa ornynda oqys jaǵdaı bolǵan joq. Jaqyn ornalasqan eldi mekenderge zııan kelmegen», - delingen TJD habarlamasynda.
Degenmen, sol mańdaǵy turǵyndar aýyr soqqydan úılerinde qabyrǵalary jarylǵanyn aıtýda. Taǵy bir dúkenniń qojaıyny BAQ ókilderine saýda ornynyń terezesiniń shytynaǵanyn aıtyp, shaǵymdanǵan.
Aıta keteıik, qorǵasyn zaýytynyń aýmaǵynda ornalasqan murjany belgisiz tulǵalar qoparyp, qulatýǵa shaq qaldyrǵan bolatyn. Olar murjanyń tómengi jaǵyndaǵy temir metaldy alý úshin buzǵan. Saldarynan eski murja apatty jaǵdaıǵa jetip, sol aýmaqtaǵy adamdardyń ómiri men densaýlyǵyna, jaqyn ornalasqan úıler men nysandarǵa qaýip tóndirgen bolatyn.
Eske salsaq, buǵan deıin Shymkenttegi qorǵasyn zaýyty aýmaǵynda qulaýǵa shaq qalǵan eski munara men temirjoldyń ústindegi kópir buzylatyndyǵy týraly habarlaǵan bolatynbyz.