Shymkenttegi qoǵamdyq kólikter 600-ge jýyq jańa avtobýspen tolyǵady

NUR-SULTAN. QazAqparat – Shymkent qalasynyń ákimi Erlan Aıtahanov megapolıstegi qoǵamdyq kólik máselesi qalaı sheshilip jatqany týraly aıtty, dep habarlaıdy QazAqparat tilshisi.

«Bizdiń qalada qoǵamdyq kólikti kúnine 650 myńǵa jýyq adam paıdalanady. 25 tasymaldaýshy mekemede 1 621 avtobýs bar. Olardyń 60 paıyzy eskirgen. Jolaýshylarǵa qyzmet kórsetý sapasyn jaqsartý úshin bıyl 300 jańa avtobýs alyndy», - dedi Shymkent qalasynyń ákimi OKQ-da ótken baspasóz málıhatynda.

Shahar basshysy qalanyń qoǵamdyq kólik máselesin sheshý úshin Nur-Sultan qalasynyń tájirıbesi qoldanylatynyn, arnaıy mamandarmen birlese jumys toby qurylyp, jol kartasy bekitilgenin aıtyp ótti.

«Josparǵa sáıkes, qalanyń kólik salasyn damytý shemasy ázirlenedi. 2020 jyly 590 jańa avtobýs alynady. Odan bólek, kelesi jyly qoǵamdyq kólik baǵyttaryn jańa formatqa kóshirý, zamanaýı dıspetcherlik ortalyq qurý, elektrondyq bılettendirýdi engizý jumystary júrgiziledi», - dedi ol.