Shymkenttegi «Qazybek» ámbebap bazary qala syrtyna kóshiriledi
ASTANA. QazAqparat - Shymkent qalasyndaǵy retsiz saýda men bazarlardy joıyp, zaman talabyna saı saýda oryndary men alyp dúkenderdiń qurylysyn qolǵa alýymyz kerek.
Osyǵan sáıkes qalanyń bas jospary boıynsha iri bazarlardyń bári qala syrtynda ornalasatyn bolady. Búgin qaladaǵy birqatar áleýmettik nysandardy aralaý barysynda Ońtústik Qazaqstan oblysy ákimi Janseıit Túımebaev osylaı málim etti, dep habarlaıdy óńir basshysynyń baspasóz qyzmeti.
Janseıit Túımebaev Rysqulov pen Dýlatı kósheleriniń qıylysynda ornalasqan «Qazybek» ámbebap bazarynda boldy. Mundaǵy qujynaǵan halyq pen eshqandaı sanıtarlyq talaptarǵa jaýap bermeıtin júıesiz saýda retterin kórgen ákim bazar jyl sońyna deıin qala syrtyna kóshiriletinin aıtty. Sondaı-aq Elbasynyń tapsyrmasyna sáıkes Shymkentti iri megapolıske aınaldyrý boıynsha jańa jobalardyń qolǵa alynyp jatqanyna toqtaldy. Atalǵan bazardy qala syrtyna kóshirýdi jyl sońyna deıin sheshýdi qala basshylyǵyna tapsyrdy.
«Qazirgi talaptarǵa sáıkes bul bazar qala syrtyna kóshiriletin bolady. Sondyqtan mundaǵy saýda jasap jatqan kásipkerler túsinistikpen qarap, bizge qoldaý bildirýi qajet. Saýdagerler dalada qalmaıdy. Bárine zań talaptaryna saı zamanaýı úlgide salynyp jatqan Bozaryq shaǵynaýdanyndaǵy saýda ortalyǵynan oryn beriletin bolady. Sondyqtan atalǵan bazardy jyl sońyna deıin jaýyp, kóshirýdi tapsyramyn», - dedi Janseıit Túımebaev.
Oblys ákiminiń bul talabyna sondaǵy satýshylar de qoldaý bildirip, kóshýge baılanysty eskertý sharalarynyń der kezinde júrip jatqandyǵyn jetkizdi.
«Jergilikti bılik qoıyp otyrǵan talaptar óte oryndy. Mynadaı bazarda qystyń sýyǵy men jazdaǵy aptap ystyqta turyp saýda jasaý aıtarlyqtaı qıyndyqtar týdyrady. Sondyqtan biz kóshýge ázirmiz. Tek jańa bazardan oryn berseńizder bolǵany», - dedi bir top satýshylar.
«Qazybek» ámbebap bazarynda jemis-jıdek, kókónis pen kúndelikti tutynýǵa arnalǵan jáne qurylysqa qajetti taýarlar saýdalanady. Saýda ortalyǵynyń jalpy aýmaǵy 20 595 sharshy metrdi quraıdy. Onyń ishinde 10 719 sharshy metri saýda alańyna jatady.
