Shymkenttegi qaǵaz shyǵaratyn jalǵyz zaýyt shıkizat tapshylyǵynan toqtap tur
ShYMKENT. QazAqparat - Shymkentte 4 jyldan beri qaǵaz shyǵaratyn jalǵyz zaýyt shıkizat tapshylyǵynan toqtap tur. «Aq Barys», «Báıterek» saýda tańbasyndaǵy keńse qaǵazdaryn shyǵaratyn kásiporyn bastapqyda shıkizatty Qytaıdan aldyrǵan. Keıinnen Reseı men Fın elinen tasymaldaǵan. Degenmen bul áreketter óndiriste ketken shyǵyndy aqtamapty. Onyń ústine ótken jyly AQSh dollarynyń qymbattap, teńgeniń qunsyzdanýy seriktestiktiń jumysyn toqtatýǵa májbúr etken, dep habarlaıdy QazAqparat HAA tilshisi.
Óndirisi turalap qalǵan «Qaǵaz shahary SEZ» seriktestiginiń basshylyǵy ótken jyly tyǵyryqtan shyǵýdyń jolyn ózdiginshe qarastyrdy. Dúnıejúziniń birqatar memleketterin aralap, qaǵaz shyǵarý tehnologııasyn zerttep shyqqan kásiporyn qyzmetkerleri qaǵaz shyǵarýǵa qajet qarasora ósimdigin egýdi qolǵa aldy. Qara kúzde 50 gektar jerge egilgen ósimdikti jınap alǵan zaýyt qazir soranyń sabanynan qaǵaz shyǵarýdy josparlap otyr. 
Bul shıkizat keńsede qoldanylatyn qaǵaz qunyn eki esege deıin tómendetýge múmkindik beredi. Sala mamandary sondaı-aq bul ósimdikke dúnıejúzinde suranys kóp ekenin aıtady. Óıtkeni qarasoradan tamaq óndirisi, farmatsevtıka, kosmetologııa, toqyma, qurylys salasyna qajet 25 myń túrli zat daıyndalady. Al, talshyǵy kilem óndirisine qajetti jip retinde de óńdeledi. Sondyqtan seriktestik bıylǵy jyly egistik kólemin arttyrmaq. 
«Qazaqstanda orman nemese bambýk sharýashylyǵy joq. Al, qarasora ósirý barlyq jaǵynan tıimdi. Ári bul ósimdikti qazir sheteldikter de surap jatyr. Brendtik kıimder shyǵaratyn kompanııalar da ony kórip, bizben kelisimshartqa otyrdy. Bıyl 600 ga alqapqa osy ósimdikti egýge daıyndalyp jatyrmyz»,-deıdi «Qaǵaz shahary SEZ» JShS-niń arnaıy ókili Baýyrjan Manatov. 
Dese de óndirisi bir jyldan beri toqtap turǵan zaýytqa ınvestıtsııa qajettiligi týyndaǵan. Kásiporyn basshylyǵy otandyq qaǵaz shyǵarýǵa atsalysqysy keletin ınvestor bolsa óndiristiń jandanyp ketetinine senimdi.
