Shymkenttegi iri jol apatyna sebepker bolǵan júk kóliginiń júrgizýshisi qamaýǵa alyndy
ShYMKENT. QazAqparat - Shymkenttegi iri jol apatyna «Hovo» júk kóliginiń júrgizýshisi kináli ekeni anyqtaldy. Bul týraly oblystyq ІІD baspasóz qyzmeti málimdedi, dep habarlaıdy QazAqparat HAA tilshisi.
Belgili bolǵandaı, jol kólik oqıǵasy búgin tańǵy saǵat 8-der shamasynda oryn alǵan. 26 jastaǵy «Hovo» júk kóliginiń júrgizýshisi joldyń qarsy betine shyǵyp ketip, VAZ-21070 kóligimen soqtyǵysqan. Saldarynan jeńil kóliktiń 1985 jylǵy júrgizýshisi men 1960 jáne 1984 jylǵy eki jolaýshy oqıǵa ornynda jan tásilim etken. Osy kólikte bolǵan taǵy eki jolaýshy Shymkent qalalyq jedel járdem aýrýhanasyna jatqyzyldy. Aldyn ala habarlaǵanymyzdaı, dárigerler ekeýiniń de jaǵdaıy aýyr dep baǵalaýda.
Qazirgi tańda qaıǵyly jaǵdaı boıynsha oblystyq ІІD Anyqtaý basqarmasy jáne Eńbekshi polıtsııa bóliminiń qyzmetkerleri jol apatynyń sebep-saldaryn anyqtap, Qylmystyq kodekstiń 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» boıynsha is qozǵady.
Birneshe saraptamalar taǵaıyndalyp, júk kóliginiń júrgizýshisi ýaqytsha tergeý abaqtysyna qamaýǵa alyndy. Tergeý amaldary júrgizilýde.
