Shymkenttegi dendrosaıabaqtyń jasyl jelegin qalpyna keltirý úshin 1 mlrd teńge jumsalady

ASTANA. QazAqparat – Shymkent qalasynyń ákimi Murat Áıtenov ortalyq kommýnıkatsııalar qyzmetinde ótken brıfıngide dendrosaıabaqtyń jasyl jelegi nege qýrap qalǵanyn túsindirdi, dep habarlaıdy QazAqparat tilshisi.

Brıfıng kezinde jýrnalıst áıgili dendrosaıabaqtyń nege qıyn jaǵdaıǵa túskenin surady.

«Birinshiden, dendrosaıabaq erekshe qorǵalatyn aýmaqta tur. Ony eshkim satqaly jatqan joq. Jýyqta onyń aýmaǵynan berilip ketken 0,3 gektar jer telimin qaıtardyq», - dedi Murat Áıtenov.

Aıtýynsha, saıabaqtyń jasyl jelegin buǵan deıin syrttan sý tasyp sýaryp kelgen.

«Dendrosaıabaq jyl saıyn damyp keledi. Eń bastysy ol jerde sýarý júıesi bolmaǵan. Sonyń kesirinen saıabaq qazirgi kúıge túsip otyr. Bıyl jobalaý-smetalyq qujattaryn daıyndap, sýarý júıesine 1 mıllıard teńgeden astam aqsha bóldik. Onsyz máseleni sheshý múmkin emes. Qazir saıabaqtyń topyraǵyn zerttep jatyrmyz. Shymkenttikterdiń kóbi biledi. Dendrosaıabaq burynǵy qoqys polıgonynyń ornynda ornalasqan», - dedi ákim.