Shymkenttegi «Dańq» memorıaly - TMD elderi aýmaǵyndaǵy eń iri eskertkishterdiń biri
Jeńistiń 65 jyldyǵynda salynǵan keshenniń ortasyna «Juldyz» eskertkishi ornatylyp, aınalasyndaǵy granıt qabyrǵaǵa oblystan shyqqan Keńes Odaǵynyń 51 Batyry men Dańq ordeniniń 8 ıegeriniń esimi jazylǵan.
140 000-nan astam esim jazylǵan jan-jaǵyndaǵy taqtaıshalardyń kólemi 200 metr bolatyn Dańq Alleıasy kompozıtsııany jalǵastyrady. Jaýyngerlerdiń tiziminen qan maıdanda habarsyz ketken jaýyngerlerdiń de aty jónin tabýǵa bolady. Sebebi, Ekinshi dúnıejúzilik soǵysqa Ońtústik Qazaqstan oblysynan 140 myńdaı adam attanǵan bolsa, sonyń jartysyna jýyǵy qan maıdannan oralǵan joq. Soǵysqa qatysqandardyń tizimin tolyqtyrýǵa qajetti málimet tirnektep jınalǵan. Oblystyń áskerı komıssarıaty Reseıdegi muraǵattarmen baılanysyp, Ońtústik Qazaqstandyq ardagerlerge qatysty barlyq málimetti alýǵa tyrysqan. Kompozıtsııany kádimgi jaýyngerlik ushaq jalǵastyryp tur. Barlyq soǵysqan ońtústikqazaqstandyq jaýyngerlerdiń esimin qara granıtke túsirý sol kezdegi oblys ákimi Asqar Myrzahmetovtiń usynysy bolatyn. Ol usynysty oblystyń barlyq kásipkerleri qoldap, jalpy quny 220 mln. teńge bolǵan eskertkishtiń qurylysyna aqsha bólgen edi.
Memorıalǵa jaqyn mańda Aýǵanstan soǵysynda opat bolǵan jaýyngerlerdiń qurmetine arnalǵan áskerı tehnıkalardyń ashyq aspan astyndaǵy murajaıy ornalasqan. Osylaısha 2010 jyly oblys ortalyǵynan Dańq memorıalynyń ashylýy Ońtústik Qazaqstan oblysynyń ardagerleri úshin úlken syılyq boldy. Aıta keteıik, tarıhı keshendi jańǵyrtyp, úlkeıtýge qazynadan 262 mıllıon teńge jumsalǵan bolatyn. Eskertkish keshen búginde Shymkenttegi kórnekti oryndarynyń biri ǵana emes, turǵyndardyń taǵzym etetin jerine aınalyp otyr.
