Shymkenttegi «Bekjan» bazarynyń 280 sharshy metr aýmaǵy órtenip ketti
Qalalyq TJD baspasóz qyzmetiniń málimetinshe, órt kúndizgi saǵat 15:13 bastalǵan. Órttiń kesirinen aınala kók tútinge oranyp, tipti joldar da kórinbeı qalǵan. Bul kórinisterdi turǵyndar uıaly telefondaryna túsirip, áleýmettik jelilerde bólisken. Qalanyń tótenshe jaǵdaı qyzmeti dúńgirshekterdegi órttiń sóndirilgenin habarlady.
«Temirlan tas jolyndaǵy «Bekjan» bazarynyń aldynda avtokólik turaǵynda ornalasqan aıaq-kıim dúńgirshekteri janyp jatqany belgili boldy. Órtti sóndirýge TJD-nyń 70 órt sóndirýshisi men 24 dana arnaıy tehnıkasy jumyldyryldy. Jalyn 280 sharshy metr aýmaqty sharpyǵan. Oqıǵadan zardap shekkender joq. Tilsiz jaý saǵat saǵat 15:40 shamasynda sóndirildi. Qazirgi tańda órttiń shyǵý saldary anyqtalýda» delingen habarlamada.
Aıta keteıik, «Bekjan» bazary buǵan deıin de órtengen bolatyn. Ol kezde saýda ortalyǵy tolyqtaı órtenip, qaza tapqandar da tirkelgen. Qanshama kásipker shyǵynǵa batyp, olarǵa ótemaqy berilgen edi.
