Shymkenttegi balalar úıinen qashyp ketken eki jasóspirim qyz izdestirilip jatyr
ASTANA. QazAqparat - Shymkenttegi №3 Balalar úıiniń eki tárbıelenýshisi joǵalyp ketti, dep habarlaıdy QazAqparat Otyrar.kz saıtyna silteme jasap.
Polıtsııa qalada joǵalyp ketken eki balalar úıiniń tárbıelenýshisi Vıola Sýrvılova men Anastasııa Kosıanenkonyń izdestirilip jatqanyn naqtylady. Eki qyz 14, 15 jasta. Olar 16 aqpan kúni keshke qaraı Barhatnaıa kóshesinde balalar úıinen shyǵyp ketip, qaıta oralmaǵan.
Anastasııanyń shashy ashyq tústi, qońyr kózdi, boıy shamamen 165-170 sm. Kók jeıde, qara shalbar kıgen, aıaǵynda ashyq jasyl tústi krossovka bolǵan.
Vıolanyń shashy qara, qońyr kózdi. Kletkaly qyzyl kúreń jeıde, qara shalbar, aq krossovka kıgen.
«Іzdeý jumystaryna eriktiler de qosyldy. Fotosýretteri áleýmettik jelilerge taratyldy. Jasóspirim qyzdardy kórgender nemese olardyń qaıda ekenin biletin adamdar 102 nomerine nemese 8777 679 18 24 mobıldi telefon nomerine habarlasýyna bolady» delingen habarlamada.
