Shymkenttegi balalar temir jolynyń ornyna velojol salynýy múmkin
ShYMKENT. QazAqparat - Shymkenttegi balalar temir jolynyń ornyna velojol salynýy múmkin. Bul týraly qala ákimi Ǵabıdolla Ábdirahymov «Nur Otan» partııasynyń kezekti otyrysynda aıtyp ótti, dep habarlaıdy QazAqparat tilshisi.
Qala ákiminiń sózinshe, kóptiń kóńilindegi másele boıynsha qoǵamdyq tyńdaý ótkizý qajettiligi týyndap otyr. Sebebi, keıingi kezde kópshilik arasynda balalar temirjoly shyn máninde qajet pe degen saýal týyndaǵan.
«Múmkin, ol jerge velojol salǵan durys shyǵar. Máselen, Ortalyq stadıonnan dendrosaıabaqqa deıingi aýmaqqa 7 shaqyrymdaı arnaıy velojol salynsa, salaýatty ómirge bet buratyn turǵyndardyń qatary artar edi. Ázirge bul jospardy da qarastyryp jatyrmyz. Jalpy, qala turǵyndaryna aıtarym, kez kelgen másele boıynsha turǵyndarmen birlesip sheshýge daıynbyz. Shymkent - ortaq úıimiz. Barlyq tolǵandyrǵan máseleni mámilemen shesheıik, usynystaryńyzdy árdaıym eskeremiz»,-dedi qala ákimi.
Aıta keteıik, buǵan deıin Shymkenttegi balalar temir joly isten shyǵyp, onyń relsterin urlap ketken bolatyn.
Foto: otyrar.kz
