Shymkenttegi balabaqshalar 25 mamyrdan bastap ashylatyn boldy
Basqarma basshysynyń aıtýynsha, mektepke deıingi mekemelerge balalardy qabyldaýy boıynsha jańa algorıtm qabyldanǵan. Oǵan sáıkes, balabaqshaǵa barǵysy keletin balalar men ondaǵy tárbıeshilerden densaýlyǵy týraly anyqtama talap etiledi.
«Algorıtmge sáıkes, birinshi kezekte balany pedıatrdyń anyqtamasymen qabyldaıtyn bolamyz. Balanyń densaýlyǵy jaqsy ekenin dáleldeıtin qujattardy suraımyz. Sonymen qatar, balabaqshadaǵy qyzmetkerlerdiń de densaýlyqtary jóninde árqaısysynan anyqtamasyn talap etemiz. Budan bólek, ata-anasy nemese olarmen qarym-qatynastaǵy týystarynyń da saýlyǵy jazylǵan qujattaryn suratyp, arnaıy tekserýden keıin ǵana balalardy balabaqshaǵa kirgizemiz»,- dedi Janat Tájıeva.
Basqarma basshysy bul júıeniń saqtyq sharalary men qoǵam qaýipsizdigi úshin qolǵa alynǵanyn aıtady. Onyń sózinshe, ár toptaǵy bala sany 15-ten aspaıdy. Qazirgi kezde osy maqsatta arnaıy tizim jasaqtala bastaǵan. balabaqshaǵa kelýshi búldirshinder men barsha qyzmetkerlerdiń sát saıyn dene qyzýy tekserilip, qoldary arnaıy antıseptıktermen zalalsyzdandyrylyp otyrmaq. Qalanyń bas pedagogy saqtyq sharalary úshin balalardyń ara qashyqtyǵy saqtalyp, balabaqsha aýmaǵy, ǵımarattyń ishi men syrtynda sanıtarlyq talaptar qatań saqtalatynyn jetkizdi.
Aıta keteıik, búginde mıllıonnan asa halyq turatyn qalada barlyǵy 529 balabaqsha bar. Onda 77 myńnan asa búldirshin tárbıelenedi.