Shymkenttegi aımaqtyq áleýmettik-ınnovatsııalyq ýnıversıtetin tekserý aıaqtaldy - mınıstrlik
NUR-SULTAN. QazAqparat - Shymkent qalasyndaǵy aımaqtyq áleýmettik-ınnovatsııalyq ýnıversıtette jospardan tys tekserý aıaqtaldy.
Bul týraly QR Bilim jáne ǵylym mınıstrligi baspasóz qyzmetinen málim etti, dep habarlaıdy QazAqparat tilshisi.
«2019 jyldyń tamyz aıyndaǵy jospardan tys tekserý qorytyndysy boıynsha ýnıversıtettiń bilim berý qyzmetinde Qazaqstan Respýblıkasynyń bilim berý salasyndaǵy zańnamasynyń talaptaryn buzý, onyń ishinde 20 óreskel zańbuzýshylyq anyqtalǵan. Buzýshylyqtardy joıýdy baqylaý turǵysynan jospardan tys tekserý JOO-nyń 15 buzýshylyǵy joıylmaǵanyn anyqtady. Atap aıtqanda, ondaı áreketter talapkerlerdi qabyldaý kezinde belgili boldy. Sondaı-aq, bilim berý qyzmetterin kórsetý boıynsha kelisimshart túsý emtıhandaryna deıin jasalǵandyǵy anyqtaldy. Máselen, talapker men ýnıversıtet arasynda kelisimshart 9 maýsym kúni jasalsa, ýnıversıtetke túsý úshin áńgimelesý 2019 jylǵy 15 tamyz kúni júrgizilgen», - delingen mınıstrlik málimetinde.
Vedomstvonyń habarlaýynsha, Shymkent qalasyndaǵy aımaqtyq áleýmettik-ınnovatsııalyq ýnıversıtetiniń túlekterine eńbek naryǵynda suranys joq. 2018 jylǵy 8152 túlektiń 10 paıyzy kúndizgi, 77 paıyzy keshki jáne 13 paıyzy syrttaı oqyǵan. Bul rette bitirýshilerdi daıarlaý baǵyttary boıynsha jumysqa ornalastyrý 0-den 41 paıyz aralyǵynda.
«Tekserý barysynda sabaq kestesin saqtamaý faktileri tirkelgen. Tekserý kezinde sabaqqa oqytýshy men stýdentter qatyspaǵan da jaǵdaılar bolǵan. Sonymen qatar, dáristerdi ǵylymı dárejesi joq aǵa oqytýshylar oqıtyndyǵy belgili boldy. Tekserý qorytyndysy boıynsha materıaldar sotqa jiberilip, bilim berý qyzmetin júrgizý quqyǵyna lıtsenzııadan aıyrý máselesi qarastyrylatyn bolady», - dep naqtylady baspasóz qyzmeti.
