Shymkenttegi aýrýhanalar men ortalyqtarda oblys turǵyndary da emdele alady
ShYMKENT. QazAqparat - Shymkenttegi aýrýhanalar men ortalyqtarda oblys turǵyndary da emdele alady. Bul týraly qalalyq Densaýlyq saqtaý basqarmasynyń basshysy Nurlan Qasymov málimdedi, dep habarlaıdy Qazaqparat tilshisi.
Basqarma basshysynyń sózinshe, qaladaǵy barlyq medıtsınalyq mekemeler ákimshilik baǵynystylyǵyna qaramastan halyqqa burynǵysha kómek kórsete beretin bolady.
«Oblystyq klınıkalyq aýrýhana dál baıaǵysha oblys turǵyndarymen qatar, qala turǵyndaryna da kómek kórsetedi. Al, eger qalanyń ıeligine ótken kardıo ortalyqqa keler bolsaq, eki jaqtyń turǵyny da aýrýhana kómegine júgine alady. Muny eki ákimdik te, Densaýlyq saqtaý mınıstrligi de qoldap otyr. Sondyqtan, oblysta jáne qalada tıisti medıtsınalyq uıymdar bolmaǵansha osylaı jalǵasa bermek», - dedi Nurlan Qasymov.
Eske salsaq, aýmaqtyq bólinisten soń Túrkistan oblysynyń menshigine Shymkenttegi oblystyq klınıkalyq jáne balalar aýrýhanasy, eki perınataldy ortalyq, týberkýlezge qarsy jáne psıhonevrologııalyq dıspanserler qalǵan bolatyn. Qalǵan emdeý mekemeleri qalalyq densaýlyq saqtaý basqarmasynyń qaramaǵyna ótken edi.
