Shymkenttegi atystan qaza tapqan oqýshynyń máıiti búgin úıine jetkizildi
ShYMKENT. QazAqparat - Shymkenttegi atystan qaza tapqan oqýshynyń máıiti búgin úıine jetkizildi. Marqumnyń týystarynyń sózinshe oq atqandar sol mańdaǵy turǵyndardy da mert qyla jazdaǵan, dep habarlaıdy QazAqparat HAA tilshisi.
Belgili bolǵandaı, 14 jastaǵy Jamal Aslanov Lengir qalasyndaǵy kómekshi mektep-ınternatynda bilim alǵan. Al mereke kúni Voroshılovka eldimekenindegi naǵashy ájesiniń úıine barypty.
«Lengir kómekshi mektebinde jetinshi synypta oqıtyn. Osy 8 naýryz merekesi qarsańynda áke-sheshesi kelip alyp ketken. 9 naýryz kúni janyndaǵy eki bala keldi de, ol kelmeı qaldy. Jalpy, ol mektepte bireýmen sózge kelmeıtin. Ne de bolsa osy mańnan shyǵyp otyr ǵoı», - deıdi Lengir kómekshi mektep-ınternatynyń dırektory Bahytjan Amanjolov.
Al qaza tapqan balanyń týystary bolsa sýyq qarýmen oq jaýdyrǵandar kórshi aýyldan kelgenin aıtady.
«Olar «Birinshi mamyr» eldimekeninen kelip, bizdiń balaǵa tıisken. Mazarat jaqtan tórteý bolyp kelip, qaısysyn uraıyq dep suraǵan. Keıinnen vınchestermen atqan bulardy. Sonda turǵan kelindi de atpaqshy bolǵan. Ol ólgen balanyń artyna buǵyp qalǵan. Keıin aıady ma, áıteýir ol tiri qaldy. Úsheýin atyp ketti. Jaraqat alǵandar da týystarymyz. Meniń nemerem»,- deıdi qaza tapqan oqýshynyń naǵashy ájesi.
Qalaı bolǵanda da jetkinshektiń aǵaıyndary balanyń ólimine kinálilerdiń tıisti jazasyn alýyn surap otyr. Al oqıǵa ornynda qoǵamdyq tártipti baqylaý kúsheıtilip, oǵan arnaıy jasaq sarbazdary jumyldyrylǵan.
Eske salaıyq, keshe tús aýa Shymkenttiń irgesindegi Voroshılovka eldi mekeninde atys bolyp, úsh adam zardap shekken bolatyn. Onyń ishinde 14 jastaǵy jasóspirim aýrýhanaǵa barar jolda jan tásilim etti. Al, búgin tańerteń osy qylmysqa qatysy bar degen kúdikti Jambyl oblysy, Qordaı aýdanynda qashyp bara jatqan jerinen qolǵa tústi. Onyń úsh sybaılasy áli izdestirilip jatyr. Óńirdiń polıtseıleri osy oqıǵaǵa qatysty Qylmystyq kodekstiń «Qasaqana kisi óltirý» babymen is qozǵap, tergeý amaldaryn júrgizýde.
