Shymkenttegi AQTQ juqtyrǵan balalarǵa biregeı dári-dármekter osy aptada jetkiziledi - QR Densaýlyq saqtaý mınıstrligi
ASTANA. Maýsymnyń 8-i. QazAqparat /Marlan Jıembaı/ - Shymkenttegi AQTQ juqtyrǵan balalarǵa biregeı dári-dármekter osy aptada jetkiziledi. Bul týraly búgin atalǵan vedomstovda ótken baspasóz máslıhaty barysynda QR Densaýlyq saqtaý mınıstrligi Medıtsınalyq jáne dári-dármek qyzmetin baqylaý komıtetiniń bas sarapshysy Ǵalymjan Myrzahmetov málim etti.
«QR Densaýlyq sqataý mınıstrliginiń tapsyrmasymen vedomstvonyń birqatar qyzmetkeri dári-dármek jetkizýshilermen kelissóz júrgizý maqsatynda Máskeýge ketken bolatyn. Sebebi dárini óndiretin «Brıstol-Maıers» farmatsevtıka kompanııasynyń bas ókildigi osynda ornalasqan. Bul kóterilip otyrǵan másele tikeleı kezdesý barysynda sheshiletin jaıt bolatyn», deıdi Ǵ.Myrzahmetov.
Onyń atap ótýinshe, erteń, ıaǵnı maýsymnyń 9-y kúni Shymkent qalasyna atalǵan dáriniń 1 aılyq kólemi jetkizilmek.
Sonymen qatar ol tender ótkizilgen kezde normatıvtik-quqyqtyq aktiler aıasynda arzan baǵamen usynylǵan patenttelmegen dári-dármektiń konkýrstan ótip ketkendigin alǵa tartady. «Bul oraıda patenttelmegen dáriniń elimizge enýine QR Densaýlyq saqtaý mınıstrliginiń esh qatysy joq. Sebebi tenderdi «SK-Farmatsııa» ótkizgen bolatyn», deıdi ol.
