Shymkenttegi 99 nysan qala menshigine ótti

ShYMKENT. QazAqparat -Túrkistan oblysy men Shymkent qalasy arasynda nysandardy bólý balansy jasalyp, 99 nysan shym qalanyń kommýnaldyq menshigine ótti. Bul másele búgin qalalyq máslıhattyń kezekten tys 41-sessııasynda qaraldy, dep habarlaıdy QazAqparat tilshisi.

Sessııa barysynda qalanyń 2018-2020 jyldarǵa arnalǵan bıýdjetine tolyqtyrýlar men ózgerister engizilip, 2018-2020 jyldarǵa arnalǵan damý baǵdarlamasy bekitildi. Bul máseleler depýtattar tarapynan biraýyzdan qoldaý tapty.

Máslıhatta qala ákimi Ǵabıdolla Ábdirahymov ózine júktelgen fýnktsııalar men mindetterdiń oryndalýy týraly esep berdi. Qala statýsynyń ózgerýine baılanysty negizgi kúsh ákimshilik-uıymdastyrý jumystaryna baǵyttalǵanyn aıtqan qala basshysy jergilikti atqarýshy organdardyń turaqty jumys isteýin qamtamasyz etý úshin qysqa  merzimde kóptegen is-sharalar atqarylǵanyn jetkizdi. Máselen, qalalyq ákimdiktiń basqarý qurylymyna ózgerister engizilip, qyzmetkerlerdiń sany 509-dan 721-ge jetken. Al, ákimdiktiń 15 salalyq bólimderi qaıta qurylymdalyp, basqarma bolyp ózgertilgen. Taǵy jańadan 8 basqarma qurylǵan.

Shymkentte atqarylǵan jumystardyń 10 aılyq kórsetkishterine toqtalǵan shahar basshysy ónerkásip óniminiń kólemi 384 mlrd teńgeni qurap, ótken jylmen salystyrǵanda 4 paıyzǵa artqanyn atap ótti. Osy kezeń aralyǵynda  ındýstrıaldy-ınnovatsııalyq damý baǵdarlamasy boıynsha 9,5 mlrd teńgeni quraıtyn 8 joba iske qosylyp, jańa 613 jumys orny ashylǵan.

«Osydan eki jyl buryn qabyldanǵan damý tujyyrymdamasy boıynsha Shymkentti mıllıon turǵyny bar qalaǵa jetkizý maqsaty qoıylǵan edi. Biz oǵan qol jetkizdik. Taıaýda Ońtústik Koreıaǵa baryp qaıttym. Onda Seýl qalasynyń basshylyǵymen kezdesip, qurylys kompanııasynyń basshylarymen birqatar kelisimderge qol jetkizdik. Endi kelesi jyly qalada úlken qurylys jumystary bastalady», - dedi Ǵabıdolla Ábdirahymov.