Shymkenttegi 6506 áskerı bólimi 55 jyldyq mereıtoıyn atap ótti
Saltanatty jıynda bólimniń qurylýyna kúsh salǵan ardagerler jas urpaqqa ulaǵat aıtty. Elimizdegi rýhanı reformany qoldap, Otanǵa degen súıispenshilikti eseleýge úndedi. Mereıli merekege ujym úlken jetistiktermen jetti. Bul shańyraqta el tynyshtyǵyn qyzǵyshtaı qoryǵan ór minez, ójet tulǵaly talaı býyn tárbıe aldy. Olar qazir jaýapty qyzmetterdi abyroımen atqaryp, el ishinde tynyshtyq ornaýyna eńbek sińirip júr.
Aıta keteıik, jarty ǵasyrlyq shejiresi bar bólim alǵashqyda Jambyl qalasynda ornalasqan bolatyn. Jedel-qyzmettik tapsyrmalar kóleminiń ulǵaıýyna baılanysty 3 jyldan keıin Shymkentke kóshirildi. Sodan beri Ulttyq Ulan bóliminiń memlekettik mańyzdy strategııalardy iske asyrýda róli orasan. Bólimniń quramynda qanatyn qataıtqan sarbazdar 1993 jylǵy tájik-aýǵan shekarasyndaǵy qaqtyǵysqa qatysyp, sodyrlarǵa qarsy tura bildi. Qazir de bólim sapyndaǵy jastar qoǵamdyq tártipti saqtaýda óz mindetterin adal atqaryp júr.
