Shymkenttegi 17 jastaǵy jasóspirimniń ólimine qatysty bes kúdikti qamaldy
Polıtsııa departamenti baspasóz qyzmetiniń málimetinshe, Túrkistan oblystyq balalar aýrýhanasynyń dárigerlerine qatysty tergeý sharalary búginnen bastalǵan.
«03.06.2020 jyly Túrkistan oblysynyń balalar aýrýhanasynyń dárigerlerine qatysty Eńbekshi polıtsııa basqarmasymen QR QK 317-baby boıynsha (medıtsına qyzmetkerleriniń kásibı mindetterin tıisinshe oryndamaý) materıal tirkelgen» delingen habarlamada.
Sondaı-aq, polıtsııa qyzmetkerleri jappaı tóbeles bolǵan túni Túrkistan oblystyq balalar aýrýhanasyna 3 kámeletke tolmaǵan jasóspirim ártúrli dene jaraqattarymen túskenin aıtady. Olardyń arasynda Abzalbek Ýtkýrovtyń jaǵdaıy óte aýyr bolǵan. Jedel-izdestirý is-sharalary barysynda polıtsııa qyzmetkerleri sol túni, izin sýytpaı kúdiktilerdiń barlyǵyn anyqtap, olardyń beseýi qamaýǵa alynǵan. Ekeýine eshqaıda ketpeý týraly qolhat túrindegi bultartpaý sharasy qoldanylyp, taǵy bir kúdiktige izdeý jarııalanǵan.
«Qazir osy qylmystyq oqıǵa boıynsha QR QK 106-babynyń 2-bóligi 5,7,11-tarmaqtary (kórineý kámeletke tolmaǵan adamǵa qatysty buzaqylyq nıetpen aldyn ala sóz baılasý arqyly adamdar toby jasaǵan densaýlyqqa qasaqana aýyr zııan keltirý) boıynsha bastalǵan sotqa deıingi tergep-tekserý amaldary júrgizilýde. Tergeý barysynda jappaı tóbeleske 10 kámeletke tolmaǵan jasóspirim men bir eresek turǵyn qatysqany anyqtalǵan. Tóbelesten soń kúdiktilerdiń barlyǵy oqıǵa ornynan boı tasalaǵan»,- delingen habarlamada.
Aıta keteıik, kúni keshe osy jappaı tóbelesten aýyr dene jaraqatyn alǵan 17 jastaǵy Abzal Ýtkýrov aýrýhanada qaıtys bolǵan edi. Onyń týystary tóbeleske qatysqandardyń Abzaldyń basyn shlakoblokpen uryp, tyrnaqtaryn julyp alǵanyn aıtqan bolatyn.