Shymkentte jylytý maýsymyndaǵy qaýipsizdik máselesi jiti baqylaýǵa alyndy
ShYMKENT. QazAqparat - Shymkentte qaýipsizdik boıynsha qurylǵan arnaıy top qala turǵyndarmen kezdesýler ótkizýde. Qaladaǵy 4 aýdan ákimdikteriniń basshylary tótenshe jaǵdaılar qyzmetkerlerimen birge úıler men kóshelerdiń, oramdardyń basqarýshylarymen gaz qaýipsizdigi boıynsha jınalys uıymdastyrdy, dep habarlaıdy QazAqparat tilshisi.
Aıta keteıik, qalada sońǵy tórt kúnde 7 adam, onyń ishinde 4 bala ıisten ýlanyp qaıtys bolǵan edi. Osyǵan oraı keshe qala ákimi Nurlan Saýranbaevtyń tóraǵalyǵymen qaýipsizdik máseleleri boıynsha jedel keńes ótip, arnaıy mobıldi top quryldy. Búgin osy top músheleri halyqpen kezdesý barysynda turǵyndardyń qaýipsizdik sharalaryn saqtaýyn qadaǵalaý, apatty jaıttardyń aldyn alý jaıyn túsindirip ketti.
Jıyn barysynda anyqtalǵany, sońǵy ýaqytta aımaqta tehnıkalyq qyzmet kórsetýshiler men murja tazartyp berýshiler sany artqan. Olardyń qyzmet quny 800-den 2500 teńgege deıin bolady. Degenmen, mamandar gaz qubyryn teksere bermeıdi eken. Sondyqtan, turǵyndarǵa tek kórsetilgen qyzmet úshin ǵana aqy tóleý qajettigi aıtyldy. Al, qaýipsizdik máselesine nemquraıly qaraıtyn kompanııa basshylaryna jergilikti ákimdikter tarapynan eskertýler jasaldy.
«Kim gaz peshteri men murjalardy tekserý aktisine qol qoısa, sol adam jaýapty bolady. Tipti adam ólimine alyp kelgen apatty jaǵdaıda qylmystyq is qozǵalatynyn eske salamyz» delingen eskertpede.
