Shymkentte jylytý maýsymy bastalǵaly 11 úıge jylý berilmeı otyr - Janseıit Túımebaev

Aımaq basshysy qalanyń áleýmettik-ekonomıkalyq damýyna keri áser etip otyrǵan birqatar máselelerdi sóz etip, bul baǵytta atqarylyp otyrǵan jumystardy qatań synǵa aldy, dep habarlaıdy QazAqparat tilshisi.


Janseıit Qanseıitulynyń sózinshe, aǵymdaǵy  jyldyń 9 aıynyń qorytyndysy kirister boıynsha salyq túsimderiniń jospary 70 mln teńgege oryndalmaǵanyn kórsetken. Memlekettik satyp alýlar boıynsha quzyrly organ tarapynan 81 konkýrsta zańbuzýshylyqtar anyqtalypty. 2009-2016 jyldar aralyǵynda jańadan iske qosylǵan 278 nysannyń 52-si osy ýaqytqa deıin ádilet organdarynda memlekettik tirkeýden ótpegen. Qazirgi tańda qalada toqtap turǵan kásiporyndardy qaıta iske qosý nemese olardy basqa maqsatqa paıdalaný boıynsha jumystar óz deńgeıinde júrgizilmeı otyr. Aǵymdaǵy jyldyń 1-shi qyrkúıektegi jaǵdaıy boıynsha 53676 shaǵyn orta bıznes sýbektileri jumys isteıtin bolsa, ótken jylmen salystyrǵanda olardyń sany 4,2 paıyzǵa tómendegen. Sondaı-aq, ótken 2016 jyly aýylsharýashylyǵy maqsatynda berilgen jerlerdi túgendeý jumystary nátıjesinde 1180 adamnyń  3074 gektar jeri  paıdalanylmaı jatqany anyqtalǵanymen, memleket menshigine qaıtarylmaı keledi.

«Bozaryq eldi mekeniniń mańynda topyraqty jáne Badam ózeniniń boıynda qumdy shaǵyl qospasyn zańsyz paıdalaný derekteri jıi oryn alýda. Ystyq núktelerge qosýǵa engizilgen Samal-3, Asar, Qursaı, Azat, Toǵys turǵyn alaptary men Tasken, Yntymaq móltek aýdandary turǵyndaryn turaqty, sapaly elektr energııasymen qamtamasyz etý boıynsha jobalyq-smetalyq qujattary osy ýaqytqa deıin ázirlenbegen. 2016 jyly berilýge tıisti Bozaryq jartylaı jabyq qosalqy stantsııasy áli kúnge deıin iske qosylmaı tur. Qaladaǵy 1167 úı búgingi tańda jańadan tartylǵan gaz júıesine qosylmaǵan», - dedi oblys ákimi.
 

Janseıit Túımebaev sonymen qatar qaladaǵy qoǵamdyq baǵyttardaǵy kólikterdiń júrýine de kóńili tolmaıtynyn jetkizdi. Onyń aıtýynsha,  shahardyń ortalyǵyndaǵy 70 qoǵamdyq baǵytqa áli kúnge deıin 11-15 oryndyq shaǵyn avtobýstarmen qyzmet kórsetiledi. Olardy sıymdylyǵy úlken avtobýstarǵa aýystyrý jumystary óte baıaý júrgizilýde. Qalalyq baǵyttardaǵy kólikterdiń keshki ýaqyttaǵy jıiligi jalpy alǵanda 25-30 paıyzdan aspaıtyny anyqtaldy. Keste boıynsha 18-20 kólik júrýi tıis baǵyttarda 1 nemese 2,3 kólik qyzmet kórsetse, keshke múldem júrmeıtin baǵyttar bar. Al, jol qurylysy salasy boıynsha 2015-2016 jyldarǵa ótpeli bolǵan 13 nysan tapsyrý merziminen keshiktirilip otyr. «Órleý» jobasyna qatysty qarastyrylǵan 438 mln teńgeniń 144 mln teńgesi ıgerilmegen. Qysqa merzimdi kásiptik oqýdy aıaqtaǵan 1247 adamnyń 17-si nemese 1,1 paıyzy ǵana jumysqa ornalasqan. Oblys boıynsha 63 myńǵa jýyq adam jumyssyz retinde tirkelse, onyń 20 myńy Shymkent qalasynyń turǵyndary. Shaharda jumyssyzdyq deńgeıi 5,3 paıyzdy qurap otyr.

Oryn alǵan kemshilikterdi atap ótken aımaq basshysy kúni keshe ǵana taǵaıyndalǵan qala ákimi Nurlan Saýranbaevqa naqty tapsyrmalar júktedi.