Shymkentte jyl basynan júk kólikterine 100 mln teńgeden astam aıyppul salyndy

ShYMKENT. QazAqparat - Shymkentte jyl basynan beri mólsherden artyq júk artqan kólikterge qatysty 622 ákimshilik hattama toltyrylyp, 100 mln teńgeden asa aıyppul salynǵan.

Bul týraly qalalyq kóliktik baqylaý ınspektsııasy men júk tasymaldaýshylardyń kezdesýi barysynda aıtyldy, dep habarlaıdy QazAqparat.

Basqosýda ınspektsııa mamandary qala kóshelerinen júretin júk kólikteriniń joldardyń sapasyn qurtyp jatqanyn aıtty.

Olardyń sózinshe, tıisti mólsherden artyq zat artqan kólikter kóshe joldaryn buzyp jatyr. Júk tıegen aýyr kólikterdiń jalpy salmaǵy 25 tonnadan aspaý kerek bolsa, júk tasymaldaýshylar aýyr kólikke 40 tonnaǵa deın zat artady.

«Salmaq parametriniń saqtalmaýyna jol bergen ol júk tıeýshi, ıaǵnı karer ıesi. Júk jóneltýshi ákimshilik jaýapkershilikten jaltarý úshin taýar tólqujattaryn bermeıdi»,- deıdi qalalyq kóliktik baqylaý ınspektsııanyń basshysy Erjan Joldasov.

Kezdesý barysynda ınspektsııa basshylyǵy qala aýmaǵynda 27 kum óndirý orynynyń jumystarynda da túrli zańbuzýshylyqtar oryn alyp jatqanyn jetkizdi.

«Jol kartasy baǵdarlamasy aıasynda júrgizilgen saraptama qortyndysyna sáıkes, bul 27 oryn da zańsyz dep tanylyp otyr. Óıtkeni olar ornalasqan jer telimderi basqa maqsatqa berilgen. Bir jerge meshit salýǵa, endi bir jerler saýda ortalyǵy qurylysyna berilgen. Bul másele boıynsha ınspektsııa tarapynan tıisti sharalar júrgizilýde»,- deıdi Erjan Joldasov.