Shymkentte jýyrda 5 myń oryndyq jataqhananyń qurylysy bastalady
Kezdesýde Úkimet ókilderi Jastar jylynda qolǵa alynǵan jumystar men bekitilgen sharalar boıynsha jáne memlekettik jastar saıasatynyń negizgi basymdyqtary týraly aıtty.
Jıynǵa QR Premer-Mınıstriniń orynbasary Gúlshara Ábdiqalyqova men Bilim jáne ǵylym mınıstri Kúlásh Shámshıdınova jáne Shymkent qalasynyń ákimi Ǵabıdolla Ábdirahymov, sondaı-aq OQMÝ-dyń oqytýshylary men stýdentteri qatysty.
Eń aldymen Gúlshara Ábdiqalyqova jınalǵan qaýymǵa Elbasynyń «Áleýmettik qamqorlyq» jańa áleýmettik sharalaryn túsindirý boıynsha úkimettik toptyń mindetteri týraly habarlady. Ol bul jumys toby barǵan toǵyzynshy óńir ekenin atap ótti jáne barlyq óńirlerde halyq memlekettiń jańa áleýmettik saıasatyna túsinistikpen qarap, qoldaý bildiretinin aıtty.
Bilim jáne ǵylym mınıstri K. Shámshıdınova jastarǵa memleket tarapynan kórsetilip jatqaý qoldaýlar men bilim berý júıesin jetildirý sharalary, bilim berý qyzmetkerleriniń jalaqysynyń 1 maýsymnan bastap 30%-ǵa deıin artatyny jáne qoǵamdaǵy muǵalimderdiń rólin arttyrý týraly aqparat berdi.
«Elbasymyzdyń bastamasymen Qazaqstanda bilim salasyna úlken qoldaý jasalýda. «Bolashaqpen» qanshama jastar shetelde biliktiligin arttyryp, elimizdiń damýyna úles qosyp jatyr. Elbasynyń 5 áleýmettik bastamasynyń aıasynda qosymsha 20 myń grant berildi. Bul - Jastar jylynda erekshe qoldaý. Jastar úshin jataqhana máselesi de ózekti. Qazirgi tańda buǵan aıryqsha nazar aýdarylýda. Bul baǵytta búginde 20 kelisimshart jasalyp jatyr. Onyń ishinde, Shymkentte ázirge 3 kelisimshart túzildi. Atap aıtsaq, 2-ýi - pedagogıkalyq ýnıversıtette, 1-ýi - medıtsınalyq akademııaǵa tıesili», - dedi Bilim jáne ǵylym mınıstri.
Aıta keteıik, Shymkentte qazir 48 oqý orny men 39 jataqhana bar. Olarda jeti jarym myń stýdent turyp jatyr. Áli de 8 myń oryn jetispeıdi. Osy máseleni sheshý úshin qalada 8 gektar jer telimi bólingen. Jaqyn arada munda 5 myń oryndyq jataqhananyń qurylysy bastalady.