Shymkentte júrgizýshiler men kondýktorlar narazylyq bildirip, jumysqa shyqpaı qoıdy

ShYMKENT. QazAqparat – Shymkentte 50-ge tarta avtobýs júrgizýshisi men kondýktor narazylyq bildirip, jumysqa shyǵýdan bas tartty, dep habarlaıdy QazAqparat tilshisi.

Bes baǵyt boıynsha júretin avtobýs júrgizýshileri men kondýktorlar qazan aıynan beri jalaqy almaǵan.

Olardyń sózinshe avtopark qojaıyny, aılyq suraǵandardy shetinen jumystan shyǵara bastaǵan.

«Tańǵy saǵat tórtten tursaq ta jarytyp aılyq almaımyz biz. Júrgizýshimen birge kúni-túni júrip, 3 myń teńge alsaq ta soǵan rıza bolyp qaıtamyz. Bir kún jospar ótkizbeı kórshi, jumysqa shyǵarmaıdy. Al, anaý keńsede jyly jerde otyrǵandar 220 myń teńge alady. Biz sol 60 myń teńgeni de ala almaı otyrmyz»,- deıdi kondýktor Gúlnár Júnisova.

Júrgizýshiler bastapqyda avtopark qojaıyny aılyqtyń kólemin 180 myń teńgege deıin kóterýge ýáde etkenin aıtty.

«Qazir kúıeýim ekeýmizge nebári 45 myń teńge beredi, árqaısymyzǵa 22500 teńgeden. Bizge aıtady, sender kúte turyńdar dep. Nege ózderi aılyqtarynan tóleı turmaıdy. Qazir nesıelerimizdi de tóleı almaǵandyqtan, dúnıe múlkimizdi arestke qoıyp tastady. Bala-shaǵamyzdy kim asyraıdy?»,- deıdi kondýktor Aıgúl Sálimbaeva.

Al, avtopark dırektory bolsa, bul máselelerdiń barlyǵy ýaqytsha qıyndyqtar ekenin aıtty.

«Basynda bizge shyǵyny kóp baǵyttar berdi. Marshrýttardyń 70 paıyzy ózin-ózi aqtamaıdy, túsken aqsha olardyń aılyqtaryn tóleýge jetpeıdi. Biraq soǵan qaramastan keshiktirip berip jatyrmyz. Qazir bizge ákimshilik járdem berip, sýbsıdııaǵa qol jetkizemiz ba dep otyrmyz. Ol qarajatty qańtar aıynan bastap alamyz dep josparlanýda. Qazannyń aılyǵyn endi beremiz. Sýbsıdııa alǵan soń júrgizýshilik aılyqtaryn 200 myń teńgege deıin kóteremiz», - deıdi Shymkent Bus avtoparkiniń dırektory Elikbaı Toqbergenov.

Aıta keteıik, «Shymkent Bus» avtoparki 12 baǵyt boıynsha jolaýshylar tasymaldaıdy. Kompanııada 480 jumysshy bar.