Shymkentte jumyspen qamtý júıeli túrde júrgizilýde

ShYMKENT. QazAqparat – Shymkentte jumyssyz azamattardy áleýmettik qorǵaý jáne halyqty jumyspen qamtý júıeli túrde júrgizilýde. Qalalyq jumyspen qamtý jáne áleýmettik qorǵaý basqarmasy bıyl «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda 34 myńnan asa adamdy áleýmettik qoldaý sharasymen qamtyǵan, dep habarlaıdy QazAqparat tilshisi.

Atalǵan basqarmanyń málimetinshe, birinshi baǵyt «Baǵdarlamaǵa qatysýshylardy tehnıkalyq jáne qysqa merzimdi kásiptik oqýmen qamtamasyz etý» boıynsha 7 696 azamatty oqytý josparlanǵan. Tehnıkalyq jáne kásiptik bilimi bar qadrlardy daıarlaýǵa 1 196 adam jiberilip, qysqa merzimdi kásiptik oqytýǵa 4 005 azamat joldama alǵan.

Ekinshi baǵyt «Jappaı kásipkerlikti damytý». Jappaı kásipkerlikti damytý aıasynda 53 azamatqa ekinshi deńgeıli bankter men kredıttik seriktestikter tarapynan nesıe berilgen. 4 502 azamatqa jańa bıznes ıdeıa úshin memlekettik granttar berý josparlanyp, búgingi tańǵa olardyń 1 257 grant ıelerine qarajat tapsyrylǵan.

Kásipkerlikke oqyǵandarǵa arnalǵan «Bastaý-bızneske» jospary boıynsha 2 955 turǵyn qarjymen qamtylǵan. Sonymen qatar úshinshi baǵyt «Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý» boıynsha 23 514 azamat turaqty jumysqa turǵyzylǵan.

Olar negizinen memlekettik jáne aımaqtyq damytý baǵdarlamasy boıynsha jańa ashylǵan mekemelerge, «Jastar praktıkasy» boıynsha, aqyly qoǵamdyq jumystarǵa jumysqa ornalasqan. Al, «Jastar-el tiregi» jalpy ulttyq jobasynyń keshendi is-sharalaryn iske asyrý barysynda kásipkerlikke 1 400-ge tarta jas oqytý kýrstaryna jiberilgen.