Shymkentte júk mashınasy 3 kóliktiń ústine aýdaryldy

ShYMKENT. QazAqparat - Shymkentte júk kóligi 3 avtokóliktiń ústine aýdaryldy, dep habarlaıdy QazAqparat tilshisi.

Jol-kólik oqıǵasy Rashıdov kóshesiniń boıynda boldy. «Gaz-53» markaly júk kóliginiń júrgizýshisi rýlge ıe bola almaı qalyp, mashınanyń aýdarylýyna jol bergen. Saldarynan kólik jýý ortalyǵynda turǵan 3 jeńil avtokólik janshylyp qaldy.

Oqıǵa kýágeriniń málimetinshe, «Gaz-53» markaly mashınanyń tejegishi isten shyqqan. Vıdeo avtorynyń sózinshe, úsh kóliktiń ekeýine qatty zaqym kelgen.

Polıtsııa qaza bolǵandar men zardap shekkender joq ekenin málim etti. «Janshylǵan jeńil kólikter jeke azamattarǵa tıesili. Olardyń shyǵynyn óteý jaǵyn sot sheshedi»,- dedi Polıtsııa departamentiniń baspasóz qyzmetinen.

«Patrýldik polıtsııa polkiniń qyzmetkerleri júk kóliginiń júrgizýshisine qatysty QR Ákimshilik quqyq buzýshylyq týraly kodekstiń 610-babymen («Kólik quraldary júrgizýshileriniń jol júrisi qaǵıdalaryn adamdardyń densaýlyǵyna zııan keltirýge, kólik quraldarynyń nemese ózge de múliktiń búlinýine alyp kelgen buzýshylyǵy») ákimshilik hattama toltyryldy. Jınaqtalǵan is-qujattar ákimshilik sotqa joldanady», - delingen polıtsııa habarlamasynda.