Shymkentte júk kóligi baǵdarshamda turǵan segiz kólikti soǵyp ketti
ShYMKENT. QazAqparat - Shymkentte júk kóligi baǵdarshamda turǵan segiz kólikti soǵyp ketti. Jol kólik oqıǵasy qaladaǵy Báıdibek bı men Arǵynbekov kósheleriniń qıylysynda oryn alǵan, dep habarlaıdy QazAqparat tilshisi.
Búgin tańerteńgi saǵat on birler shamasynda Hovo júk kóligi baǵdarshamda turǵan kólikterdi súrip ótip, jaıaý júrginshiler jolyna shyǵyp ketken. Kýágerlerdiń aıtýynsha, júk kóligi aldymen «Daewoo Gentra» markaly mashınany soǵyp, birneshe metrge súırep ketipti. Sóıtip baǵdarshamnyń mańynda turǵan beıne kamera baǵanasyna soǵysqan kólik kólik jaramsyz kúıge túsken. Saldarynan «Daewoo Gentra»-nyń júrgizýshisi basy jarylyp, qatty zardap shekken. Jaraqat alǵan júrgizýshini jedel járdem kóligi aýrýhanaǵa alyp ketti. Oqıǵa ornynda taǵy bir «Shevrolet Cruze» avtokóligi júk kóliginiń aldynda qalyp qoıyp, jaramsyz halge túsken. Júk kóligi munan ózge taǵy tórt avtokólik pen eki avtobýsqa zaqym keltiripti. Degenmen jolaýshylary da, jaıaý júrginshiler de din aman.
Qazirgi tańda tártip saqshylary oqıǵa ornynda anyqtaý jumystaryn júrgizip jatyr. Segiz birdeı kólikke zaqym keltirgen júk kóliginiń baǵdarshamda ne úshin toqtaı almaǵany ázirge belgisiz. Tejegishi isten shyǵýy múmkin degen boljamdar da aıtylýda.
