Shymkentte jolaýshylar avtobýsy jetispeıdi
ShYMKENT. QazAqparat - Shymkenttegi qoǵamdyq kólikter kesteden keshigip, keshke qaraı júrmeı qoıady. Qala ákimdiginde shahar basshysynyń tóraǵalyǵymen ótken alqaly jıynda qoǵamdyq kólik júrgizýshileriniń jumys barysyndaǵy kemshilikteri sóz boldy, dep habarlaıdy QazAqparat tilshisi.
Jıyn barysynda turǵyndardy alańdatatyn máseleler, ıaǵnı qoǵamdyq kólikterdiń jetispeýshiligi men jolaýshylarǵa qyzmet kórsetý sapasynyń tómendigi, 20.00-ge deıin kólik baǵyttarynyń saqtalmaýy talqylandy. Qalalyq kólik jáne avtojoldar bóliminiń basshysy Qýatjan Jumataevtyń aıtýynsha, kólik kompanııalarynyń basshylary ózderiniń basty mindetterin oryndamaıdy, avtoturaqtaryn jańartpaıdy. Sonymen qatar, keıbir baǵyttarda eshqandaı bazasy joq jáne bir avtobýsy joq kólik kompanııalary qyzmet etedi. Saldarynan 10 baǵytpen kelisimshart úzildi. Onyń beseýi paıda ákelmegendikten jabylǵan bolsa, beseýi ýaqytsha basqa kompanııaǵa berilgen. Sondaı-aq tasymaldaýshylar 12 baǵyt boıynsha shyqpaıtyndaryn aıtqan. Sebebi, kezinde talasyp júrip tasymaldaý múmkindigin jeńip alǵan kóptegen kompanııada qazir avtobýstyń jetispeýshiligi baıqalady.
«Nur Qýanysh» kompanııasynyń kúndelikti baǵytqa 21 avtobýs shyǵýy kerek bolsa, onyń óziniń balansynda tek qana 10 avtobýs qana bar. ıAǵnı, 11 avtobýs jetpeıdi. "Man Ońtústikke" keletin bolsaq, 26 baǵytta qyzmet kórsetedi. Olarda da tek 17 avtobýs bar»,- deıdi Qýatjan Jumataev. 
Keleńsizdiktiń kesirin qarapaıym halyq tartyp otyr. Óıtkeni, avtobýstardyń azdyǵynan qoǵamdyq kólikterdiń júrý jıiligi buzylǵan. Al, áý bastaǵy kelisimshart boıynsha kompanııalar jyl saıyn avtobýstardyń 20 paıyzyn jańǵyrtyp otyrýy tıis bolǵan. Biraq, kompanııa basshylary bul talapty oryndamaı, avtobýstaryn jańartpaǵan.
«Bizde eń basty eki másele bar. Onyń birinshisi, avtobýstardyń eskirgeni men olardyń júrmeý qalýyna baılanysty. Ekinshisi, tıisti bólim men kompanııalar arasynda durys baılanystyń joqtyǵy. Eger biz birlesip osy máseleni sheshsek, qalǵan jaǵdaılar ózdiginen retteletin bolady»,- deıdi qala ákimi Nurlan Saýranbaev.
Avtobýstardy jańartyp, jumys sapasyn jaqsartý isine endi qala ákimdigi aralasatyn boldy. Ol úshin bılik «Vıraj - lızıng» kompanııasymen kelisimge kelgenin jetkizdi. Atalmysh kompanııa «Damý» qory arqyly kólikti nesıege beredi. Sóıtip, belgili merzim ishinde tehnıkalyq qyzmet kórsetýge de kelisip otyr. Jıyn sońynda jolaýshy tasymaldaýshy kompanııa basshylary men qala ákimdigi qalalyq kólikti odan ári damytý, Shymkenttegi kólik júıesin jaqsartý máselesin talqylaıtyn dóńgelek ústel uıymdastyrý týraly sheshim qabyldady. 
