Shymkentte jol salǵan merdigerlerge 816 eskertý jasalǵan

ShYMKENT. QazAqparat – Shymkent qalasyndaǵy 19 jol men kóshege 37 ret saraptama júrgizgen «Jol aktıvteriniń ulttyq sapa ortalyǵynyń» mamandary kóptegen kemshilikterdi anyqtaǵan. Tekserý qortyndysy boıynsha merdiger kompanııalarǵa 816 eskertý berilgen, dep habarlaıdy QazAqparat tilshisi.

Memlekettik kásiporynnyń málimetinshe, atqarý qujattary boıynsha 263 (32%) jáne qurylys montajdaý jumystary boıynsha 512 (63%), jol qurylys materıaldary boıynsha 41 eskertý (5%) berilgen. Sondaı-aq, qala kósheleri men joldarynyń sapasyna qoldanylatyn materıal jáne tehnologııalyq protsestiń saqtamalmaýy áser etken. Belgili bolǵandaı, merdiger mekemeler jol-qurylys jumysy kezinde kóliktiń osine túsetin júkteme boıynsha qoldanystaǵy normatıvti eskermegen.

Máselen, kóliktik baqylaý ınspektsııasynyń derekteri boıynsha Shymkent qalasynyń aýmaǵynda jer qoınaýyn paıdalanýshylardyń 38 kareri tirkelgen. Bul karerlerde «HOWO» markaly 1 myńǵa jýyq karerlik júk kóligi kúndelikti júk tasymaldaıtyny anyqtalǵan. Osynyń kesirinen jol tez buzylady jáne onyń jıi jóndeý qajet. Qazirgi tańda fılıal mamandary tarapynan qala joldarynda aýyr salmaqty júkterdiń júrý jıiligi esepke alynýda.

«Ulttyq jol aktıvteri sapasy ortalyǵy» RMK Shymkent qalasy boıynsha fılıalynyń 2019 jylǵy Shymkent qalasy boıynsha avtomobıl joldaryn salý, rekonstrýktsııalaý, jóndeý jáne kútip-ustaý kezinde jumystar men materıaldardyń sapasyna júrgizilgen saraptama jumystarynyń qorytyndysy boıynsha merdiger jáne tehnıkalyq qadaǵalaý mekemelerine jol sapasyn arttyrý maqsatynda birqatar tapsyrmalar berildi» delingen habarlamada.